Kapphlaupið í hundrað landsleiki

Óskar Ófeigur Jónsson skrifar 8. júní 2021 12:31

Aron Einar Gunnarsson, Birkir Már Sævarsson og Ragnar Sigurðsson eru allir komnir mjög nálægt því að spila hundrað landsleiki fyrir Ísland. Getty/Pressefoto Ulmer

Rúnar Kristinsson er eini Íslendingurinn sem hefur náð að spila hundrað leiki fyrir A-landsliðs karla í knattspyrnu. Það er hins vegar von á því að það bætist í hópinn í ár og það eru nokkrir sem eru til kallaðir.

Ragnar Sigurðsson spilaði sinn 97. A-landsleik 12. nóvember 2020 og var þá langlíklegastur til að verða maður númer tvö í hundrað leiki fyrir karlalandsliðið.

Ragnar var eftir þennan leik á móti Ungverjum í Búdapest, fyrir sjö mánuðum síðan, með fjögurra leikja forskot á næsta mann sem var Birkir Már Svarsson. Hann var líka sjö leikjum á undan þeim Aroni Einari Gunnarssyni og Birki Bjarnasyni.

Nú er staðan orðin allt önnur. Á meðan Ragnar Sigurðsson hefur ekki spilað aftur fyrir A-landsliðið þá hafa hinir þrír gert miklu meira en að nálgast hann.

Í leiknum á móti Færeyjum á föstudagskvöldið þá komst Birkir Bjarnason upp að hlið Ragnars og landsliðsfyrirliðinn Aron Einar er aðeins einum leik á eftir.

Í annað sætið er aftur á móti kominn Birkir Már Sævarsson með 98 landsleiki. Birkir Már missti þó af leikjunum á móti Færeyjum og Póllandi og af möguleikanum á því að verða annar íslenski landsliðsmaðurinn í hundrað leiki. Birkir fór heim til að hjálpa Valsmönnum í Pepsi Max deildinni.

Nafni hans Birkir Bjarnason nær Birki Má væntanlega í Póllandsleiknum í kvöld og þá ætti Aron Einar að ná Ragnari Sigurðssyni í sama leik.

Staðan væri þá þannig að fjórir leikmenn væru þá með á bilinu 97 til 98 landsleiki. Íslenska liðið spilar næst þrjá leiki í september og þar ætti einhver þessara leikmanna og jafnvel fleiri en einn að komast í hundrað leikja klúbbinn.

Rúnar hefur verið sá eini í klúbbnum síðan 11. júní 2003 eða í rétt tæp átján ár. Rúnar hefur ennfremur átt markametið í tæp 22 ár eða síðan að hann jafnaði leikjamet Guðna Bergssonar 18. ágúst 1999. Rúnar hefur átt það einn síðan 8. september 1999.