Innlent

Marek dæmdur til að sæta öryggisvistun vegna brunans á Bræðraborgarstíg

Kolbeinn Tumi Daðason skrifar
Marek Moszczynski við aðalmeðferð málsins í byrjun maí.
Marek Moszczynski við aðalmeðferð málsins í byrjun maí. Vísir/Vilhelm

Marek Moszczynski, pólskur karlmaður á sjötugsaldri, var sýknaður af kröfu um refsingu fyrir að hafa orðið þremur að bana í bruna á Bræðraborgarstíg í júní í fyrra. Marek var metinn ósakhæfur og verður gert að sæta öryggisvistun. Dómur var kveðinn upp í Héraðsdómi Reykjavíkur rétt í þessu. 

Marek var dæmdur til að greiða aðstandendum þeirra sem létust og þeim sem slösuðust skaðabætur samanlagt upp á á þriðja tug milljóna króna. 

Stefán Karl Kristjánsson, verjandi Mareks, segir niðurstöðuna þá að Marek sé sýknaður af verknaðinum sem slíkum. Hann er þó talinn ábyrgur fyrir að hafa valdið brunanum. Í kjölfarið sé niðurstaðan að dæma hann til vistunar á réttargeðdeild.

„Hún er ótímabundin. Eftir atvikum má bera hana undir dómstóla, með tilefni til rýmkunar eða niðurfellingar,“ segir Stefán Karl.

Aðalkrafa um ævilangt fangelsi

Kolbrún Benediktsdóttir varahéraðssaksóknari krafðist þess við aðalmeðferð málsins í maí að Marek yrði dæmdur í ævilangt fangelsi. Marek hefur verið metinn ósakhæfur og krafðist Kolbrún vistunar á öryggisgeðdeild féllist dómurinn á niðurstöðu geðlækna um ósakhæfi. 

Málið er sögulegt en Marek er sá fyrsti í Íslandssögunni sem dæmdur er fyrir að bana þremur.

Það var síðdegis þann 25. júní í fyrra sem slökkviliðið var kallað út að Bræðraborgarstíg 1 þar sem logaði eldur. Þrettán íbúar hússins voru heima. Þrír létust en öðrum tókst að bjarga lífi sínu, sumum með því að kasta sér úr glugga á þriðju hæð hússins.

Þrjú á þrítugsaldri létust

21 árs kona og 24 ára karlmaður, bæði frá Póllandi, létust í brunanum. Önnur 26 ára kona lést af völdum höfuðáverka en hún féll niður af þriðju hæð hússins þegar hún reyndi að flýja eldinn.

Fjögur af þeim tíu sem lifðu af slösuðust. 33 ára kona hlaut væga reykeitrun. 32 ára karlmaður kastaði sér út um glugga á þriðju hæð og hlaut reykeitrun, skurði á bæði hné, staðbundna heilaáverka, mörg brot á höfuðkúpu og andlitsbeinum auk blóðtappa í slagæðum lungna.

38 ára karlmaður hlaut reykeitrun, sár á vinstri hendi og fótlegg. 58 ára karlmaður hlaut reykeitrun auk annars og þriðja stigs brunasár á samtals 17 prósent líkamans. Brunasárin teygðu sig yfir báða handleggi, handarbök, ofanvert á fingur, yfir hnéskeljar og nánast allt bak hans.

Auk þessa gjöreyðilagðist húsið við Bræðraborgarstíg 1. Það stendur þó enn á sínum stað nágrönnum til mikils ama, eins og fjallað var um í kvöldfréttum Stöðvar 2 í gær.

Manndráp og tilraun til manndráps

Marek var ákærður fyrir brennu, manndráp og tilraun til manndráps með því að hafa kveikt eld á gólfi í herbergi sínu á annarri hæð hússins, á gólfi í sameiginlegu rými á sömu hæð og undir stiga sem lá upp á þriðju hæð hússins. Þannig hefði hann valdið eldsvoða sem hafði í för með sér almannahættu.

Eldurinn breiddist hratt út um aðra og þriðju hæð hússins og var það nánast alelda þegar slökkvistarf hófst. Í framhaldi af brunanum hélt Marek að rússneska sendiráðinu við Garðastræti og sló tvo lögreglumenn með gúmmímottu. Fyrir þann verknað var hann ákærður fyrir brot gegn valdstjórninni.

Aðstandendur þeirra þriggja sem létust í brunanum og þeir sem urðu fyrir líkams- eða eignatjóni fóru fram á um 70 milljónir króna í bætur.

Dómurinn var fjölskipaður en í honum sátu tveir embættisdómarar auk geðlæknis.


Tengdar fréttir

Segir átakanlegt að horfa daglega á persónulegar eigur hinna látnu

Íbúi sem býr á móti húsinu að Bræðraborgarstíg sem brann fyrir tæpu ári síðan segist afar ósáttur við að húsið standi enn með öllu innbúi. Hún segir átakanlegt að horfa á persónulegar eigur hinna látnu og gagnrýnir að svæðið sé ekki þrifið.

„Gæti ekki verið senni­legra að hann hafi bara verið reykinga­maður?“

Stefán Karl Kristjánsson, verjandi Mareks Moszczynski, pólsks karlmanns á sjötugsaldri, segir saksóknara í málinu ekki hafa sannað að Marek hafi kveikt í húsi við Bræðraborgarstíg 1 í fyrrasumar. Það eitt hafi verið sannað fyrir dómi og það er að Marek hafi glímt við andleg veikindi í aðdraganda og kjölfar brunans.

Krafa um ævilangt fangelsi eða vistun á öryggisgeðdeild

Kolbrún Benediktsdóttir varahéraðssaksóknari fer fram á að Marek Moszczynski verði dæmdur í ævilangt fangelsi fyrir að verða valdur að dauða þriggja í eldsvoða við Bræðraborgarstíg í júní í fyrra.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×