Atvinnulíf

Algengast að vinnustaðir vilji auka ánægju starfsfólks og bæta þjónustu

Rakel Sveinsdóttir skrifar
Guðrún Högnadóttir og Kolbrún Harpa Kristinsdóttir.
Guðrún Högnadóttir og Kolbrún Harpa Kristinsdóttir. Vísir/Vilhelm

„Það var ánægjulegt að sjá áherslu svarenda á ánægju starfsmanna, bæði sem helstu stefnumarkandi áskorun vinnustaða og helsta markmið hvað varðar starfsþróun,“ segir Guðrún Högnadóttir framkvæmdastjóri FranklinCovey á Íslandi um niðurstöður rannsóknar sem gerð var meðal stjórnenda í mars síðastliðnum. Niðurstöðurnar sýna að mikil vitundavakning hefur orðið á vinnumarkaði um mikilvægi þess að bæta andlega líðan og heilsu starfsfólks og stuðla þannig að vaxandi árangri vinnustaða.

Að sögn Guðrúnar og Kolbrúnar Hörpu Kristinsdóttur, samskipta- og markaðsfulltrúa hjá FranklinCovey veita niðurstöðurnar nýja sýn á forgangsröðun stjórnenda. Velferð starfsfólks virðist vera að leiðarljósi hjá bæði einkageiranum og hinum opinbera. „Þessar niðurstöður eru að miklu leyti í takti við umræðuna, þá sérstaklega vegna tengsla vellíðan starfsmanna og frammistöðu vinnustaða,“ segir Kolbrún.

Í dag fjallar Atvinnulífið um niðurstöður rannsóknar FranklinCovey meðal vinnustaða. Rannsóknin fór fram í mars 2021. Svarendur voru 142 talsins í stöðugildum stjórnenda, millistjórnenda og framlínustjórnenda vinnustaða í opinbera- og einkageiranum.

Markmið rannsóknarinnar var að meta hvernig áskoranir og áherslur eru tengdar starfsþróun árið 2021. Þá var lögð áhersla á það að meta stefnumarkandi áskoranir í komandi endurreisn, þar með talið hvernig vinnustaðir ætla að efla þekkingu starfsfólks og hvernig kórónuveiran hefur haft áhrif á þjálfun og starfsmannaþróun.

Helstu áskoranir í kjölfar Covid

Á meðfylgjandi mynd má sjá þær tíu áskoranir sem stjórnendur segja algengustu áskoranir vinnustaða.

Þær áskoranir sem virðast vera algengastar felast í að auka ánægju starfsfólks og bæta þjónustu en yfir 90% stjórnenda greindu frá þessu.

Alls fengu svarendur sautján valmöguleika til að haka við og leyfilegt var að velja fleiri en einn möguleika. Þátttakendur gátu einnig bætt við áskorunum með opnum svarmöguleika.

Samanburður: Einkageirinn og hið opinbera

Þegar spurt var um helstu stefnumarkandi áskoranir, má sjá að nokkur munur er á svörum einkageirans annars vegar og hinu opinbera hins vegar.

Á meðfylgjandi mynd má til dæmis sjá að stjórnendur í einkageiranum leggja meiri áherslu á að auka framleiðni og skila betri rekstrarniðurstöðum, í samanburði við stjórnendur hjá hinu opinbera.

Að auka ánægju starfsfólks er hins vegar það atriði sem allir stjórnendur, eða 100% svarenda í þeim hópi, sögðu vera stærstu stefnumarkandi áskorunina framundan. Þetta segja Guðrún og Kolbrún ríma við nýjar reglur um styttingu vinnuvikunnar sem tóku gildi þann 1.maí síðastliðinn og aukna umræðu um kulnun.

Þjálfun í kjölfar Covid

„Það sem kom mér ekki á óvart var stökkbreyting íslenskra vinnustaða í stafræna þjálfun á tímum heimsfaraldursins,“ segir Guðrún en meðal niðurstaðna í rannsókninni mátti sjá að mun stærri hluti þjálfunar starfsfólks fer fram rafrænt í dag, í samanburði við fyrir heimsfaraldur. ,,„Við höfum þjónað árangri íslenskra og erlendra vinnustaða með Live-Online vinnustofum með stafrænum aðgangi að verðlaunaefni okkar í kjölfarið og gaman var að sjá góðar undirtektir íslenskra vinnustaða síðastliðna sextán mánuði. Nýir tímar kalla á nýja hugsun.“

Það sem stjórnendur segja hins vegar vera helstu hindrunina í dag við að auka þjálfun starfsfólks er skortur á tíma.

„Jákvætt var þó að mótstaða við breytingum og virði þess að fjárfesta í þjálfun skoruðu lágt, sem bendir til þess að stjórnendur átti sig á virði þess að þjálfa starfsfólk. Þar sem skortur á tíma og skortur á fjármagni var að skora hæst sem bendir til að forgangsraða þurfi þjálfun til að njóta góðs af,“ segir Kolbrún.

Lærdómur og starfsþróun 2021

Á meðfylgjandi mynd má sjá hvernig lærdóms- og starfsmannaþróunarmarkmið á komandi ári eru í samræmi við áskoranir. Þar trónir á toppnum markmið um að auka á nægju starfsfólks.

Guðrún segir þessar niðurstöður einkar ánægjulegar.

„Tíma varið í fræðslu og þróun birtist í lykilárangursbreytum svo sem nýsköpun, ánægju viðskiptavina, trausti, framleiðni, fjárhagslegri frammistöðu, starfsánægju, þjónustu, markaðshlutdeild, starfsmannaveltu og mikilvægast af öllu: vinnustaðamenningu,“ segir Guðrún og bætir við: „Þessar niðurstöður styðja við reynslu okkar í vinnu með viðskiptavinum hér heima og erlendis um að fjárfesting í nýrri þekkingu einstaklinga, teyma og vinnustaða skapar verðmæti fyrir alla hagaðila og er hverrar mínútu virði.“


Tengdar fréttir

35 prósent starfsfólks á Íslandi í basli með líf sitt

„Einna áhugaverðast er að rannsóknir tengdar bókinni styðja það enn og aftur að ein áhrifaríkasta leiðin til skapa heilbrigt starfsumhverfi og hafa jákvæð áhrif á starfsfólk er að gefa fólki tækifæri til að vaxa og nýta styrkleika sína í starfi, að sinna verkefnum sem því fellur vel að inna af hendi og hæfileikar þess nýtast,“ segir Marta Gall Jörgensen sérfræðingur hjá Gallup um nýútkomna bók, Wellbeing at Work: How to Build Resilient and Thriving Teams, eftir Jim Clifton stjórnarformann og framkvæmdastjóra Gallup á heimsvísu og Jim Harter, yfirrannsóknarstjóra.

„Eða komast allir að á föstudögum í klippingu?“

„Það sem við finnum einna sterkast er að viðhorf stjórnenda skiptir lykilmáli, hvort þeir sýni vilja og stuðning sinn í verki, sýni gott fordæmi, skoði verkefnaval og forgangsröðun í samræmi við styttinguna og séu tilbúnir að treysta starfsmönnum sínum til að skila góðu verki þótt þeir vinni styttri vinnuviku eða nýti sér annan sveigjanleika í starfi. Það sem skiptir þó mestu máli er að lykilstjórnendur sammælist um markmið með breytingunni og trúi á að hún muni skila vinnustaðnum velsæld,“ segir Guðríður Sigurðardóttir hjá Attentus um styttingu vinnuvikunnar.

Ríkið innleiðir nýja stjórnendastefnu: Vilja hæfasta fólkið

„Stjórnendur ríkisins eiga að búa yfir hæfni og þekkingu til að geta brugðist við sífellt flóknara starfsumhverfi og vinna að breytingum í samfélaginu. Sú hæfni sem lögð er til grundvallar í stefnunni eru leiðtogahæfileikar, áhersla á árangursmiðaða stjórnun, samskiptahæfni og heilindi sem er svo útfærð nánar í stefnunni,“ segir Guðrún Jóhanna Guðmundsdóttir sérfræðingur hjá Kjara- og mannauðssýslu ríkisins í fjármála- og efnahagsráðuneytinu um nýja stjórnendastefnu sem ríkið vinnur nú að því að innleiða.

Spáir því að vinnuvikan styttist fljótlega í 35 stundir og síðan 30

Ásberg Jónsson framkvæmdastjóri Nordic Visitor spáir því að mörg fyrirtæki muni á þessum áratug stytta vinnuvikuna enn meir en nú er oft rætt um. „Ég trúi því að við förum almennt að verðmeta tíma okkar á annan hátt og þar muni frístundir vega hærra. Ég er nokkuð sannfærður um að eftir ekki svo mörg ár verði flestir vinnustaðir landsins búnir að stytta vinnuvikuna niður í 35 tíma og fyrir lok þessar áratugar verði fjöldi fyrirtækja kominn niður í 30 tíma vinnuviku,“ segir Ásberg.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.