„Charli­e bit my fin­ger“ mynd­bandið til sölu

Myndbandið vakti mikla lukku á sínum tíma og hefur vafalaust lifað í minningu margra en myndbandið hefur verið spilað meira en 880 milljón sinnum á YouTube. Nú hefur fjölskylda drengjanna ákveðið að taka myndbandið af YouTube og selja það á uppboði.

Búið er að fjarlægja upprunalega myndbandið af YouTube en hægt er að sjá afrit af því hér: 

Selja á myndbandið sem NFT, sem stendur fyrir non-fungible token á ensku. Það þýðir að hluturinn sem þú eignast, í þessu tilfelli myndbandið, er erfitt að skipta út eða selja. NFT eru yfirleitt upprunalegar útgáfur af frægum myndböndum, jörmum eða tístum sem hægt er að selja eins og þau séu listaverk.

Myndbandið var upprunalega birt á YouTube af Howard, pabba Charlie og Harry, árið 2007. Ástæðan var sú að hann gat ekki sent guðforeldrum drengjanna myndbandið í tölvupósti, en þau voru þá búsett í Bandaríkjunum.

Strákarnir eru nú 17 og 15 ára og segir pabbi þeirra að nýtt tímabil í lífi þeirra sé að hefjast, þar sem þeir séu við það að verða fullorðnir. Þetta sé því rétti tíminn til þess að taka þetta skref.

Sá sem mun að lokum fá að kaupa myndbandið á uppboðinu mun fá tækifæri til að endurgera myndbandið með Harry og Charlie.

Uppboðið hefst þann 22. maí næstkomandi og talið er nokkuð líklegt að myndbandið muni seljast fyrir mjög háar fjárhæðir. Til dæmis má nefna „Disaster Girl“ jarmið, sem er mynd af ungri stelpu brosandi fyrir framan brennandi hús, en það jarm var selt nýlega sem NFT fyrir 473 þúsund Bandaríkjadali, eða um 58,4 milljónir króna.