Viðskipti innlent

Tap Icelandair tæpir fjórir milljarðar á fyrsta ársfjórðungi

Elín Margrét Böðvarsdóttir skrifar
Uppgjör fyrsta ársfjórðungs Icelandair 2021 liggur fyrir.
Uppgjör fyrsta ársfjórðungs Icelandair 2021 liggur fyrir. Vísir/Vilhelm

Heildartekjur Icelandair drógust saman um 73 prósent á fyrsta ársfjórðungi þessa árs og námu 7,3 milljörðum króna. Lækkun tekna er helst rakin til heimsfaraldurs covid-19 sem hélt áfram að hafa gríðarleg áhrif á starfsemi félagsins en sætaframboð dróst saman um 92 prósent á milli ára á fyrsta ársfjórðungi. Vegna áframhaldandi óvissu í ljósi heimsfaraldursins mun félagið ekki gefa út afkomuspá fyrir árið 2021.

Þetta kemur fram í tilkynningu frá Icelandair vegna uppgjörs fyrsta ársfjórðungs 2021. Tekjur af fraktstarfsemi jukust aftur á móti um 64 prósent. Tap nam hins vegar 3,9 milljörðum króna samanborið við 30,8 milljarða króna tap á sama ársfjórðungi í fyrra.

Samþætting feli í sér kostnaðarhagræðingu

Þá var EBIT neikvæð um 5,9 milljarða króna samanborið við neikvæða EBIT um 26,7 milljarða í fyrra. Eiginfjárhlutfjall, leiðrétt fyrir tímabundnum áhrifum áskriftarréttinda, var 23 prósent samanborið við 25 prósent í byrjun árs. Lausafjárstaða félagsins nam 35,8 milljörðum en þar af handbært fé og lausafjársjóðir að fjárhæð 14 milljarðar króna.

Þá er gert ráð fyrir að samþætting Air Iceland Connect og Icelandair sem lauk í mars feli í sér 381 milljóna króna árlega kostnaðarhagræðingu auk aukinna tekjumöguleika. Staða heimsfaraldursins og áframhaldandi ferðatakmarkanir hafa einnig áhrif á bókunarstöðu sem er enn veik í öðrum ársfjórðungi að því er segir í tilkynningunni. Þó er gert ráð fyrir að ferðum fari að fjölga á ný frá og með öðrum ársfjórðungi og framboð verði aukið enn frekar frá þriðja ársfjórðungi og horfur sagðar góðar fyrir fjórða ársfjórðung þessa árs.

Í tilkynningunni segir einnig að markaðsherferðir félagsins í Bandaríkjunum hafa haft jákvæð áhrif á bókanir til landsins og muni jafnframt opna á tækifæri þegar ferðatakmörkunum til Evrópu verður aflétt.

Bjartsýnn um bjartari tíma

Bogi Nils Bogason, forstjóri Icelandair, kveðst bjartsýnn um bjartari tíma framundan eftir því sem baráttunni við covid-19 vindur áfram, einkum í ljósi bólusetninga.

„Áhersla okkar á markvissa leiðakerfisstýringu og öflugt kostnaðaraðhald, ásamt góðum árangri í fraktflutningum, skilaði ásættanlegri rekstrarniðurstöðu þegar tekið er tillit til áhrifa COVID-19 faraldursins á uppgjör fyrsta ársfjórðungs. Þá sjáum við jákvæð teikn um aukið umfang í innanlandsfluginu en samþætting þess og alþjóðaflugsins mun stuðla að sterkara og skilvirkara flugfélagi og betri þjónustu við farþega. Þrátt fyrir áframhaldandi neikvæð áhrif faraldursins á starfsemi félagsins á síðustu vikum erum við bjartsýn á að geta aukið flugið jafnt og þétt núna í öðrum ársfjórðungi og bætt svo í framboðið frá þriðja ársfjórðungi þessa árs. Framvinda bólusetninga, sérstaklega á ákveðnum mörkuðum eins og í Bandaríkjunum, og möguleg aflétting ferðatakmarkana í Evrópu fyrir bólusetta ferðamenn, fela í sér jákvæð skref,“ er haft eftir Boga í tilkynningunni.

Bogi Nils Bogason, forstjóri Icelandair.Egill Aðalsteinsson

„Það verða mikil tækifæri fyrir Ísland og íslenska ferðaþjónustu þegar markaðir opna á ný og hefur eldgosið á Reykjanesskaga vakið enn meiri athygli á Íslandi sem áfangastað að undanförnu. Við erum tilbúin að auka flugið um leið og ástandið í heiminum batnar en sveigjanleiki leiðakerfis Icelandair og öflugir innviðir félagsins gera okkur kleift að geta brugðist hratt við breytingum á mörkuðum okkar. Þar að auki munu Boeing 737 MAX vélar félagsins, sem við höfum tekið aftur í rekstur, styrkja leiðakerfið enn frekar. Þær eru bæði hagkvæmari og umhverfisvænni kostur og geta opnað tækifæri fyrir félagið á nýjum mörkuðum.

Þá eru horfur í fraktflutningum áfram góðar. Nýlegar fjárfestingar okkar í fraktflota félagsins styðja við markmið okkar um að auka umsvif félagsins á þessu sviði á okkar helstu mörkuðum og á sama tíma styrkja Ísland sem tengimiðstöð fyrir fraktflutninga milli Evrópu og Norður Ameríku eins og við höfum gert með góðum árangri í farþegafluginu. Við erum í góðri stöðu til að takast á við áframhaldandi óvissu og á sama tíma grípa þau tækifæri sem framundan eru þökk sé útsjónarsemi og dugnaði starfsfólks okkar.“





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Mesta hækkun dagsins


Engar hækkanir skráðar í dag

Mesta lækkun dagsins


Engar lækkanir skráðar í dag
Velkomin á Vísi. Þessi vefur notar vafrakökur. Sjá nánar.