Forstjóri Danske Bank hættur vegna gruns um lagabrot

Atli Ísleifsson skrifar 19. apríl 2021 07:32

Chris Vogelzang var í hópi æðstu stjórnenda ABN AMRO á árunum 2009 til 2017. EPA

Chris Vogelzang hefur látið af störfum sem forstjóri Danske Bank eftir að fréttir bárust um að hann sé grunaður um lagabrot í Hollandi.

Bankinn segir frá þessu í tilkynningu. Þar segir að Vogelzang sé með stöðu grunaðs manns í rannsókn hollensku lögreglunnar á meintu peningaþvætti hollenska bankans ABN AMRO.

„Ég er mjög undrandi á ákvörðun hollenskra yfirvalda. Ég sagði skilið við ABN AMRO fyrir rúmum fjórum árum og er sannfærður um að ég hafi sinnt stjórnarskyldum mínum af heilindum og trúmennsku,“ ef haft eftir Vogelzang í tilkynningunni.

Hann segir hins vegar að í ljósi aðstæðna sé best að hann stígi til hliðar til að tryggja megi áframhaldandi vöxt bankans. Vísar hann meðal annars til þess að Danske Bank sé enn að fást við dómsmál sem snýr að peningapvætti í útibúi bankans í Eistlandi.

Chris Vogelzang var í hópi æðstu stjórnenda ABN AMRO á árunum 2009 til 2017.

Carsten Egeriis mun taka við stöðu forstjóra Danske Bank, að því er segir í tilkynningunni frá bankanum.

Danmörk Peningaþvætti norrænna banka

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.