Meniga fær 1,5 milljarða fjármögnun og hjálpar fólki að á­ætla kol­efnis­sporið

Aðrir þátttakendur voru sænski fjárfestingasjóðurinn Industrifonden, breski sjóðurinn UK Future Fund og bankarnir UniCredit, Swedbank, BPCE og Íslandsbanki. Þessir bankar og fjárfestingasjóðir eiga það sameiginlegt að hafa verið lengi í hópi eigenda og viðskiptavina Meniga.

Þetta kemur fram í tilkynningu frá fyrirtækinu sem segir að heimsfaraldurinn hafi valdið því að eftirspurn eftir stafrænni bankaþjónustu hafi stóraukist um allan heim. Bæði hafi faraldurinn gert það að verkum að aðgengi að útibúum hafi verið skert sökum fjöldatakmarkana og þá þurfi margir meiri aðstoð við heimilisfjármál sín.

Gera notendum kleift að sjá áætlað kolefnisspor

Að sögn forsvarsmanna fyrirtækisins verður sölu- og þjónustuteymi Meniga eflt til að mæta þessari auknu eftirspurn á heimsvísu auk þess sem áhersla verði lögð á vöruþróun og nýsköpun. 

„Sérstaklega verður horft til þróunar og markaðssetningar á vörum þar sem fjártækni og umhverfismál koma saman. Á meðal nýrra vara Meniga er umhverfisvaran Carbon Insight en hún gerir bönkum mögulegt að valdefla viðskiptavini sína í umhverfismálum. Með Carbon Insight geta notendur netbanka séð áætlað kolefnisspor á einkaneyslu sinni og gripið til aðgerða til lágmarka það. Vörunni er ætlað að hjálpa fólki um allan heim að berjast við loftlagsbreytingar.“

Vaxandi eftirspurn eftir grænum lausnum

Georg Lúðvíksson, forstjóri og meðstofnandi Meniga, segir starfsfólk vera mjög ánægt með áframhaldandi stuðning fjárfesta.

„Nýtt fjármagn mun gera okkur kleift að markaðssetja vörur okkar til væntanlegra viðskiptavina um allan heim. Carbon Insight er gott dæmi um vöru sem mikill áhugi er á en að minnsta kosti fjórir bankar í jafnmörgum löndum munu taka hana í gagnið á þessu ári og við sjáum vaxandi eftirspurn eftir henni hjá bönkum um allan heim,“ segir Georg í tilkynningu.

Svana Gunnarsdóttir, framkvæmdastjóri Frumtak Ventures, segir sjóðstýringafyrirtækið vera sannfært um að Meniga hafi mjög spennandi vaxtarmöguleika.

„Meniga hefur fest sig í sessi sem öflugur brautryðjandi í fjártæknilausnum fyrir helstu banka um allan heim, en sá markaður er nú í örum vexti sem aldrei fyrr,“ segir Svana í tilkynningu.

Um 160 starfsmenn starfa nú hjá Meniga sem er með skrifstofur í sjö löndum. Að sögn fyrirtækisins hefur hugbúnaður þess verið innleiddur hjá yfir 160 fjármálastofnunum og er aðgengilegur yfir 90 milljónum einstaklinga í 30 löndum.