Innlent

Neitar að hafa nauðgað fimmtán ára stúlku

Kolbeinn Tumi Daðason skrifar
Aðalmeðferð í málinu fer fram í dómsal Héraðsdóms Suðurlands í Vestmannaeyjum í júní.
Aðalmeðferð í málinu fer fram í dómsal Héraðsdóms Suðurlands í Vestmannaeyjum í júní. Vísir/Vilhelm

Karlmaður hefur verið ákærður fyrir að nauðga fimmtán ára stúlku. Í ákæru sem fréttastofa fékk frá skrifstofu Héraðsdóms Suðurlands kemur ekki fram hvar eða hvenær brotið átti sér stað en þó að það hafi verið að næturlagi. Farið er fram á þrjár milljónir króna í miskabætur fyrir hönd stúlkunnar.

Héraðssaksóknari höfðar málið og í ákærunni kemur fram að einstaklingurinn hafi farið með stúlkuna á einhvern stað, lokað dyrunum og hent henni niður í sófa sem var þar inni. Því næst hafi hann klætt hana úr fötunum og haft við hana bæði samræði og endaþarmsmök án hennar samþykkis og vilja.

Þannig hafi hann beitt stúlkuna ofbeldi og ólögmætri nauðung með því að toga í hár hennar og klóra bak hennar til blóðs. Hann hafi ekki látið af háttsemi sinni þrátt fyrir að stúlkan tjáði honum að hún vildi fara.

Auk þess hefði hann nýtt sér yfirburðarstöðu gagnvart stúlkunni vegna aflsmunar og þess að hún var stödd ein með honum fjarri öðrum. Hlaut stúlkan eymsli á kynfærum og endaþarmi auk klórfara á baki sínu.

Brotið telst varða við 194. grein almennra hegningarlaga. Ákærði neitar sök í málinu og er aðalmeðferð fyrirhuguð í dómsal Héraðsdóms Suðurlands í Vestmannaeyjum í júní.

Kynferðisofbeldi Ofbeldi gegn börnum
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið