Viðskipti innlent

Við­snúningur í rekstri Ís­lands­pósts sem skilaði 104 milljóna króna hagnaði

Eiður Þór Árnason skrifar
Pósturinn hefur farið í gegnum mikla endurskipulagningu á síðustu árum. 
Pósturinn hefur farið í gegnum mikla endurskipulagningu á síðustu árum.  Vísir/Vilhelm

Viðsnúningur var á rekstri Íslandspósts í fyrra sem hagnaðist um 104 milljónir króna samanborið við 511 milljóna króna tap árið 2019. Jókst afkoma félagsins þar með um 615 milljónir króna milli ára en á sama tíma drógust rekstrartekjur saman um 288 milljónir frá 2019 og námu í fyrra 7.457 milljónum króna í fyrra.

Þetta kemur fram í ársreikningi Íslandspósts sem kynntur var á aðalfundi félagsins í dag. Stöðugildum fækkaði alls um tæp 17 prósent milli ára og voru þau 601 í lok árs samanborið við 721 í árslok 2019. Vaxtaberandi skuldir voru 1.635 milljónir króna en voru 1.953 milljónir króna árið 2018. EBITDA ársins 2020, hagnaður fyrir fjármagnsliði, skatta og afskriftir, var 676 milljónir króna en 266 milljónir króna árið áður.

Að breytast úr bréfasendingafyrirtæki í pakkadreifingarfyrirtæki

Fram kemur í tilkynningu frá Íslandspósti að árið 2020 hafi verið sveiflukennt og markast af fjölgun innlendra pakkasendinga á sama tíma og erlendum pakkasendingum fækkaði. Covid-19 hafði mikil áhrif á Íslandspóst á árinu, til að mynda á þróun sendinga, afhendingar á pósti og þar með tekjur félagsins.

Þórhildur Ólöf Helgadóttir, forstjóri Íslandspósts, segir í tilkynningu að pökkum haldi áfram að fjölga í kerfi Íslandspósts á sama tíma og bréfasendingum hafi fækkað um 80% frá aldamótum. Fyrirséð sé að sú þróun eigi eftir að halda áfram og hafa mikil áhrif á rekstur félagsins. Hún segir að þrátt fyrir þann góða árangur sem hafi náðst sé félagið ekki komið á lygnan sjó.

„Þessar breytingar eru fyrirséðar og hefur mikil vinna farið í að móta og skipuleggja Íslandspóst til framtíðar með þetta í huga. Segja má að fyrirtækið hafi á síðustu árum verið að breytast úr bréfasendingafyrirtæki í pakkadreifingarfyrirtæki,“ stendur í tilkynningu.

„Það gerir verkefnið því snúnara að á sama tíma og bréfunum fækkar fjölgar bréfalúgunum. Kostnaður við dreifingarnetið eykst en kröfur um góða þjónustu vaxa. Umhverfi Íslandspósts er því síbreytilegt. Meiri áhersla er nú á stafrænar lausnir, sjálfsafgreiðslu, hraða og nálægð en Íslandspóstur og starfsmenn félagsins leggja mikla áherslu á að mæta þessum nútímakröfum,“ segir Þórhildur Ólöf.

Ný lög um póstþjónustu breyti miklu fyrir Íslandspóst

Einskiptiskostnaður vegna endurskipulagningar félagsins var 117 milljónir króna á síðasta ári og handbært fé frá rekstri 1.023 milljónir samanborið við 562 milljónir króna árið áður.

„Árangur sem þessi er alls ekki sjálfgefinn, endurskipulagning og niðurgreiðsla langtímalána hefur létt umtalsvert á félaginu og okkur tókst með samstilltu átaki stjórnar og starfsfólks að bregðast við tekjuminnkun vegna minni inn- og útflutnings. Íslandspóstur er á réttri leið,“ segir Þórhildur.

Ný lög um póstþjónustu tóku gildi í byrjun árs sem felldu úr gildi einkarétt Íslandspósts á sendingum á almennum bréfum sem félagið hafði verið með allt frá stofnun félagsins. Þá samþykkti Alþingi að pakkar upp að tíu kílóum að þyngd skyldu vera á sama verði um land allt. 

„Þetta fyrirkomulag leiddi til þess að Íslandspóstur var í þröngri stöðu varðandi verðlagningu á innlendum pakkasendingum. Íslandspóstur hafði varað við þessu fyrirfram og benti strax á þessa stöðu þegar hún kom upp og telur brýnt að endurskoða viðkomandi lagaákvæði hið fyrsta,“ segir í tilkynningu.

Stjórnendur Íslandspósts fagna þó því að Póst- og fjarskiptastofnun hafi í kjölfarið útnefnt Íslandspóst alþjónustuveitanda um allt land til allt að tíu ára. 

„Þetta var mikilvægur áfangi því stjórnendur hafa lengi þrýst á að alþjónustubyrði félagsins sé viðurkennd og að ríkið greiði fyrir póstþjónustu á óvirkum markaðssvæðum.“

Fréttin hefur verið uppfærð.


Tengdar fréttir

Mest ánægja með elds­neytis­sölu Costco en minnst með þjónustu Póstsins

Pósturinn mældist með lægstu einkunn allra fyrirtækja sem tóku þátt í Íslensku ánægjuvoginni í fyrra, eða 56,6 stig af 100. Eldsneytissala Costco var aftur á móti hæst með 85,8 stig og er það í fjórða árið í röð sem viðskiptavinir eldsneytissölunnar mælast þeir ánægðustu á Íslandi með marktækum hætti.

Öflugur viðsnúningur hjá Íslandspósti

Árangurinn af hagræðingu Íslandspósts er að koma í ljós. Útlit fyrir að afkoman verði við núllið á næsta ári eftir stanslaust tap um margra ára skeið. Forstjórinn sér fram á að Íslandspóstur geti byrjað að skila hagnaði þegar búið er að bæta skuldastöðuna.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×