Bílar

Næsta kynslóð bílastæðakerfa í borginni

Kristinn Ásgeir Gylfason skrifar
Reynir Ólafsson, framkvæmdastjóri viðskiptaþróunar hjá Öryggismiðstöðinni, við bílastæðahúsið í Kolaporti.
Reynir Ólafsson, framkvæmdastjóri viðskiptaþróunar hjá Öryggismiðstöðinni, við bílastæðahúsið í Kolaporti.

Nýjasta kynslóð bílastæðakerfa er á leið í öll sjö bílastæðahús Reykjavíkurborgar. Bílastæðakerfin eru þegar komin upp og hafa verið gerð virk í Kolaporti, Vitatorgi og Stjörnuporti og uppsetning á kerfunum stendur yfir í Traðarkoti og Vesturgötu.

Meðfylgjandi er fréttatilkynning frá Öryggismiðstöðinni.

Öryggismiðstöðin setur upp kerfin en um er að ræða myndavélar, bómur, greiðsluvélar og fleira sem tengist tæknibúnaði við bílastæðakerfin. Bílastæðasjóður valdi lausnir frá Öryggismiðstöðinni í þetta stóra og umfangsmikla verkefni.

„Við erum búin að setja upp nýjustu kynslóð bílastæðakerfa í þrjú af bílastæðahúsum borgarinnar og tæknisérfræðingar okkar vinna að uppsetningu í fleiri húsum. Í nýju kerfunum eru myndavélar sem lesa sjálfvirkt af bílnúmeraplötum þegar ekið er inn og út úr bílastæðahúsunum. Þannig getur ökumaður ekið inn í bílastæðahús sem hann velur í borginni, bóman opnast og hleypir honum inn. Myndavélar lesa bílnúmerið og ökumaður greiðir í EasyPark appinu fyrir bílastæðið og þann tíma sem hann er í stæðinu. Hann þarf raunar ekki að yfirgefa bílinn frekar en hann vill því hann getur afgreitt allt í gegnum appið í símanum. Eftir fyrstu heimsókn í bílastæðahús geta notendur valið að greiða framvegis sjálfvirkt í gegnum EasyPark appið," segir Reynir Ólafsson, framkvæmdastjóri viðskiptaþróunar hjá Öryggismiðstöðinni.

„Í greiðsluvélum er hægt er að greiða fyrir bílastæði með öllum helstu greiðslukortum, einnig er hægt að greiða með símum og öðrum snertilausum greiðslulausnum. Í greiðsluvél er slegið inn bílnúmer, greitt fyrir bílastæði og ekið út. Þetta er ákaflega einfalt, þægilegt og öruggt," segir Reynir.

Þeir sem eru áskrifendur hjá Bílastæðasjóð í langtímastæðum eru fyrir fram skráðir í kerfið og þeir keyra inn og út eins og áskriftarleið þeirra segir til um. Hugbúnaðarlausnin í bílastæðakerfinu er frá Softra og myndavélarnar frá ARH en báðir aðilar eru samstarfsaðilar Öryggismiðstöðvarinnar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.