Viðskipti innlent

Byrjaði að brugga sextán ára í bruggverksmiðju foreldranna

Kristján Már Unnarsson skrifar
Mæðginin Agnes Anna Sigurðardóttir og Sigurður Bragi Ólafsson í Bruggsmiðjunni Kalda.
Mæðginin Agnes Anna Sigurðardóttir og Sigurður Bragi Ólafsson í Bruggsmiðjunni Kalda. Arnar Halldórsson

Bruggverksmiðja er orðin stærsta fyrirtækið í rótgrónu sjávarplássi við Eyjafjörð. Upphafið má rekja til þess að sjómannshjón á Árskógssandi urðu að finna sér ný verkefni þegar eiginmaðurinn neyddist til að hætta sjómennsku.

Höfnin á Árskógssandi er tenging Hríseyjarferjunnar við fastalandið. Atvinnulífið í þorpinu snerist þó um sjávarútveg, líka hjá þeim Agnesi Önnu Sigurðardóttur og Ólafi Þresti Ólafsssyni, sem var skipstjóri.

Frá höfninni á Árskógssandi. Hríseyjarferjan Sævar að leggjast að bryggju. Bjórböðin eru í dökku húsunum á barðinu efst til vinstri.Arnar Halldórsson

„Ef þú varst ekki á sjó, þá gastu eiginlega bara flutt í burtu. En hann meiðir sig illa á fæti 2003 og gat ekki stundað sjómennskuna,“ segir Agnes í þættinum Um land allt, en brot úr honum var sýnt í fréttum Stöðvar 2.

„Þannig að við vorum í tvö ár að hugsa hvað við gætum gert. Ég vildi ekki flytja, vildi bara vera hér, þannig að við urðum að finna okkur eitthvað nýtt.“

Agnes Anna Sigurðardóttir, framkvæmdastjóri Bruggsmiðjunnar Kalda.Arnar Halldórsson

Þau stofnuðu fyrsta handverksbrugghúsið á Íslandi, Bruggsmiðjuna Kalda, árið 2006. Fyrir fjórum árum bættu þau við bjórböðum og veitingastað. Starfsmenn í vetur eru um tuttugu talsins en fjölgar upp í þrjátíu yfir sumartímann. Saman eru Bruggsmiðjan og Bjórböðin núna orðin stærsta fyrirtækið á Árskógsströnd.

„Þetta er búið að vera mikið ævintýri,“ segir Agnes.

Frá bjórböðunum á Árskógssandi. Bjórinn er þó ekki í útipottunum heldur í baðlaugum innanhúss.Arnar Halldórsson

Þau hjónin eiga fimm börn og hafa flest starfað við fyrirtækið, þeirra á meðal sonurinn Sigurður Bragi, sem er bruggmeistari.

„Þegar við erum að opna þá er ég fimmtán og byrjaði að brugga þegar ég var sextán ára,“ segir Sigurður.

-Er þetta gott uppeldi; að láta börnin fara að brugga sextán ára gömul?

„Ja, hann er allavega mjög góður bruggari. Þannig að: Já, ég held að það gefi bara góða raun,“ svarar mamman.

Fjallað er um mannlífið á Árskógsströnd í þættinum Um land allt.

Hér má sjá frétt Stöðvar 2.


Tengdar fréttir

Þegar Ströndungar hættu að róa og hófu að brugga

Þeir kalla sig oft Árskógsstrendinga, en einnig Ströndunga, segir Jón Ingi Sveinsson frá Kálfskinni þegar hann er spurður hvað íbúar sveitarinnar eru kallaðir í daglegu tali. Árskógsströnd er við Eyjafjörð á leiðinni milli Akureyrar og Dalvíkur, var áður sjálfstætt sveitarfélag en er núna hluti Dalvíkurbyggðar.

Vill auðvelda ferðafólki að sjá einu konungsgröfina á Íslandi

Ekkert aðgengi er fyrir ferðamenn að einu konungsgröfinni sem vitað er um á Íslandi. Heimamenn á Árskógsströnd vilja bæta úr þessu með gerð áningarstaðar þar sem menn geti kynnst skrautlegri sögu konungsins sem fyrir þúsund árum var fluttur nauðugur til Íslands.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×