Utah Jazz hefur aldrei byrjað betur og þriðja tap Brooklyn Nets í röð

Brooklyn Nets er ekki að gera merkilega hluti án Kevin Durant sem er í sóttkví. Nets liðið tapaði 122-11 á móti Detroit Pistons í nótt eftir að hafa lent tólf stigum undir strax í fyrsta leikhluta og tuttugu stigum undir í fyrri hálfleiknum. Þetta var þriðja tap Brooklyn liðsins í röð.

Kyrie Irving kom til baka eftir eins leiks fjarveru og skoraði 27 stig og gaf 7 stoðsendingar. James Harden var með 24 stig og 12 stoðsendingar. Saman hittu þeir aðeins úr 3 af 13 þriggja stiga skotum. Næstu menn komu með 10 stig.

Jerami Grant hefur aldrei skorað meira á ferlinum en hann var með 32 stig fyrir Pistons. Delon Wright var með 22 stig og 9 stoðsendingar.

Utah Jazz vann sinn fimmta leik í röð í nótt og þann sextánda í síðustu sautján leikum þegar Boston Celtics kom í heimsókn. Utah vann leikinn 122-108 en þetta var annað tap Boston í röð. Utah hefur unnið 20 af 25 fyrstu leikjum sínum sem er jöfnun á bestu byrjun í sögu félagsins.

Hitt liðið sem byrjaði 20-5 var liðið frá 1996-97 með Karl Malone og John Stockton í fararbroddi en það lið fór alla leið í lokaúrslitin um NBA titilinn.

Donovan Mitchell var algjörlega óstöðvandi á lokaspretti leiksins sem Utah Jazz vann 18-9. Mitchell endaði leikinn með 36 stig og 9 stoðsendingar, Joe Ingles var með 24 stig og Rudy Gobert skoraði 18 stig og tók 12 fráköst.

Joel Embiid var öflugur þegar Philadelphia 76ers endaði fjögurra leikja sigurgöngu Sacramento Kings. Embiid var með 25 stig, 17 fráköst og 6 stoðsendingar en Seth Curry og Tobias Harris voru báðir með 22 stig. De'Aaron Fox var áfram í aðalhlutverki hjá Kings liðinu með 34 stig, 10 stoðsendingar og 6 fráköst.

Philadelphia 76ers vann þarna sinn þriðja leik í röð og þann sjöunda í síðustu átta leikjum. Liðið er á toppnum í Austurdeildinni með eins sigurs forskot á Milwaukee Bucks.

Stephen Curry skoraði 32 stig fyrir Golden State Warriors í sannfærandi 114-91 útisigri á San Antonio Spurs en heimamenn voru fyrir leikinn búnir að vinna þrjá leiki í röð þar á meðal endurkomusigur á móti Warriors í fyrrakvöld.

Þetta er það besta sem ég hef séð til hans hvað varðar sjálfstraust og styrk og þá er ég að segja eitthvað. Hann hefur tvisvar verið kosinn mikilvægasti leikmaður deildarinnar en ég held að ég hafi aldrei séð hann betri, sagði Steve Kerr, þjálfari Golden State Warriors, um Stephen Curry eftir leikinn. Curry er með 29,5 stig að meðaltali í leik í vetur.

Josh Hart kom með 20 stig og 17 fráköst inn af bekknum þegar New Orleans Pelicans vann 130-101 heimasigur á Houston Rockets. Brandon Ingram skoraði 22 stig og Zion Williamson bætti við 20 stigum, 7 stoðsendingum og 5 fráköstum þrátt fyrir að spila bara í 20 mínútur vegna villuvandræða.

John Wall skoraði 25 stig fyrir Houston og Eric Gordon bætti við 23 stigum en liðið tapaði sínum þriðja leik í röð.

NBA er á Stöð 2 Sport en upplýsingar um útsendingar má finna hér. NBA körfuboltinn er hluti af Stöð 2 Sport erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.