Flugvélar Icelandair á Keflavíkurflugvelli. Vísir/Vilhelm
Icelandair hefur undanfarið auglýst stöður flugstjóra, bæði fyrir farþegaþotur af gerðinni Boeing 737 MAX og Boeing 757 farþegaþotum, á meðal starfandi flugmanna hjá félaginu.
Um 70 flugmenn starfa hjá félaginu í dag en samkvæmt kjarasamningi þeirra ber Icelandair að auglýsa slíkar stöður innan félagsins.
Ásdís Ýr Pétursdóttir, upplýsingafulltrúi Icelandair, segir ekki liggja fyrir hversu margar flugstjórastöður verður ráðið í og þá hefur ekki verið tekin ákvörðun um endurráðningu flugmanna.
Auk þess liggur ekki fyrir að svo stöddu hvenær MAX-vélarnar verða teknar í rekstur hjá félaginu né hversu margar MAX-vélar verða í flota Icelandair í sumar. Undirbúningur þess er þó þegar hafinn hjá félaginu.
Eins og staðan er í dag hafa fjórir flugmenn Icelandair verið þjálfaðir til að fljúga MAX-vélum. Flugvirkjar félagsins hafa undanfarið unnið að því að gera fyrstu MAX-vélina klára fyrir flug á ný.
Flugmenn Icelandair gangast núna undir endurþjálfun á Boeing 737 Max-þotur eftir að Flugöryggisstofnun Evrópu aflétti nærri tveggja ára flugbanni í síðustu viku. Félagið hyggst byrja að ferja þoturnar aftur til Íslands í kringum næstu helgi.
Mikillar bjartsýni gætir meðal ferðaþjónustufyrirtækja en stór meirihluti þeirra ætlar að halda sínu striki samkvæmt könnun KPMG sem unnin var fyrir Nýársmálstofu Samtaka ferðaþjónustunnar, Ferðaklasans og KPMG. Á málstofu klasans kom fram að flest ferðaþjónustufyrirtæki skorti fjármagn til fjárfestinga og að nauðsynlegt væri að byggja upp innviði landsins eins og vegakerfi.
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.
