Heimsmarkmiðin

Berjast þarf fyrir hverju einasta barni í heiminum

Heimsljós
Barnaheill - Save the Children

117 milljónir barna í heiminum þurfa á mannúðaraðstoð að halda til að lifa af árið 2021. Flest þeirra búa í Jemen eða um tæplega 11 milljón börn.

Að mati Barnaheilla – Save the Children þurfa 117 milljónir barna í heiminum á mannúðaraðstoð að halda til að lifa af árið 2021. Helmingur barnanna býr í átta löndum, Jemen, Lýðstjórnarlýðveldinu Kongó, Eþíópíu, Afganistan, Súdan, Sýrlandi, Pakistan og Nígeríu. Samtökin kalla eftir tafarlausum alþjóðlegum viðbrögðum til að tryggja að heimsfaraldurinn hafi ekki varanleg áhrif á heila kynslóð um ókomin ár.

„Mikið bakslag hefur orðið í þróunarsamvinnu vegna COVID-19. Áratuga framfarir eru komnar aftur á byrjunarreit. Áhrif COVID-19 á þróunarlönd eru ekki einungis af heilsufarslegum toga heldur eru fátækustu ríki heims að verða fyrir miklum efnahags- og félagslegum áhrifum. Foreldrar hafa misst vinnuna, matvælaóöryggi hefur aukist í kjölfar hækkandi verðbólgu og efnahagskreppu, börn hafa þurft að hætta í skóla, barnahjónaböndum hefur fjölgað, barnaþrælkun aukist og ofbeldi á börnum orðið tíðara, svo eitthvað sé nefnt,“ segir í frétt Barnaheilla – Save the Cildren.

Flest börn sem þurfa á mannúðaraðstoð að halda búa í Jemen eða um tæplega 11 milljón börn. Lýðstjórnarlýðveldið Kongó kemur þar á eftir en um 10,2 milljón börn þar í landi þurfa á aðstoð að halda. Barnaheill - Save the Children á Íslandi veita mannúðaraðstoð til barna í þessum löndum auk Sýrlands.

Inger Asher, framkvæmdastjóri Save the Children segir nauðsynlegt að mannkynið komi sér saman um að það þurfi að berjast fyrir hverju einasta barni í heiminum. ,,Árið 2021 getur verið betra eða miklu verra en árið 2020 fyrir börn. Það fer algjörlega eftir því hvernig mannkynið ætlar að bregðast við. Við þurfum að koma okkur saman um að við ætlum að bjarga hverju einasta barni í heiminum. Það er engin afsökun fyrir því að milljónir barna séu svangar dag eftir dag, neyddar til þess að vinna eða að börnin þurfi að hafna rétti sínum til náms. Áður en heimsfaraldur skall á stafaði börnum þegar ógn af loftslagsbreytingum, átökum og hungri og nú hefur bæst við enn ein ógnin. Ef við bregðumst ekki strax við eigum við á hættu að missa tugþúsundir barna af fullkomlega fyrirbyggjandi orsökum. Við getum ekki látið það gerast!"

Til þess að takast á við þessar ógnir hafa Save the Children hrundið af stað neyðaráætlun með fjárhagsáætlun upp á 769 milljónir Bandaríkjadali, til að ná til 15,7 milljóna manna, þar af 9,5 milljónir barna í 37 löndum.

Save the Children vinna hörðum höndum að því að tryggja að börn hafi aðgang að menntun og séu varin gegn ofbeldi á árinu 2021. Samtökin vinna einnig að því að tryggja fjölskyldum fjárhagslegan stuðning og aðstoð við aðgengi að heilbrigðisþjónustu, hreinu vatni og næringarríkum mat. Barnaheill - Save the Children einbeita sér sérstaklega að því að styrkja stúlkur og konur, svo þær hafi jafnan aðgang að stuðningi og þjónustu.

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.