Sara Björk komin í Puma-fjölskylduna

Sara birti myndir af sér í Puma-fatnaði og með takkaskó frá Puma á Twitter í dag. „Puma-fjölskylda, hér er ég,“ skrifar Sara við myndirnar.

Sara lék áður í takkaskóm frá Nike en hefur nú skipt yfir til Puma sem er framleiðandi búninga íslensku landsliðanna.

Sara og stöllur hennar í Lyon unnu 0-5 sigur á Paris FC í fyrsta leik sínum á árinu 2021 í frönsku úrvalsdeildinni. Lyon er í 2. sæti hennar með 36 stig, einu stigi á eftir toppliði Paris Saint-Germian. Sara hefur leikið tíu deildarleiki með Lyon á tímabilinu og skorað tvö mörk.

Lyon hóf titilvörn sína í Meistaradeild Evrópu með því að slá Juventus út í 32-liða úrslitum keppninnar, 6-2 samanlagt. Dregið verður í sextán liða úrslitin 16. febrúar.

Sara var valin íþróttamaður ársins í fyrra, í annað sinn. Hún fékk fullt hús stiga í kjöri Samtaka íþróttafréttamanna.