Handbolti

Fyrsti leikurinn á móti „óbreyttum“ Frökkum á stórmóti í meira en tólf ár

Óskar Ófeigur Jónsson skrifar
Björgvin Páll Gústavsson var í síðasta íslenska landsliðinu sem mætti óbreyttum Frökkum á stórmóti. Síðan eru liðin rúm tólf ár.
Björgvin Páll Gústavsson var í síðasta íslenska landsliðinu sem mætti óbreyttum Frökkum á stórmóti. Síðan eru liðin rúm tólf ár. EPA/GUILLAUME HORCAJUELO

Franska landsliðið hefur unnið fjölda titla á stórmótum á þessari öld en liðið í dag getur ekki státað sig af því að vera handhafi neinna þeirra.

Frakkar, mótherjar íslenska handboltalandsliðsins, eru ekki handhafar neinna titla í handboltanum í dag. Ísland hefur ekki mætt „óbreyttum“ Frökkum á stórmóti síðan í úrslitaleik Ólympíuleikanna í Peking 2008.

Frakkar hafa verið sigursælasta landslið handboltans síðustu tvo áratugi en eru ekki með eins sterkt lið í dag og oft áður.

Þeir eru enn fremur ekki heimsmeistarar, Evrópumeistarar eða Ólympíumeistarar. Danir eru ríkjandi heims- og Ólympíumeistarar og Spánverjar urðu Evrópumeistarar í fyrra.

Frakkar hafa nokkrum sinnum verið handhafar allra þriggja stóru titlana á síðustu áratugum, verið heimsmeistarar, Evrópumeistarar og Ólympíumeistarar á sama tíma.

Frakkar hafa unnið verðlaun á átta af síðustu tíu heimsmeistaramótum eða á öllum heimsmeistarakeppnum á þessari öld nema 2007 og 2013. Frakkar unnu brons á HM fyrir tveimur árum en hafa unnið gullverðlaun á fjórum af síðustu sex heimsmeistarakeppnum.

Í síðustu átta leikjum íslenska landsliðsins á móti Frökkum á stórmótum hefur franska landsliðið verið handhafi einhvers titils.

Þegar þjóðirnar mættust síðasta á stórmóti, sem var HM í Þýskalandi 2019, þá voru Frakkar sem dæmi ríkjandi heimsmeistarar.

Frakkar voru ekki handhafar neins titils þegar þeir unnu íslenska landsliðið í úrslitaleik Ólympíuleikanna 2008. Það er hins vegar í eina skiptið í síðustu tólf stórmótaleikjum þjóðanna þar sem Frakkar eru „óbreyttir“, það ekki ríkjandi meistarar á HM, EM eða ÓL.

Síðustu tólf leikir Íslands og Frakklands á stórmótum:

  • HM 2019 á móti heimsmeisturum Frakka - 9 marka tap (22-31)
  • HM 2017 á móti heimsmeisturum Frakka - 6 marka tap (25-31)
  • HM 2015 á móti Ólympíumeisturum Frakka - Jafntefli (26-26)
  • HM 2013 á móti Ólympíu- og heimsmeisturum Frakka - 2 marka tap (28-30)
  • ÓL 2012 á móti Ólympíu- og heimsmeisturum Frakka - 1 marks sigur (30-29)
  • EM 2012 á móti Ólympíu-, heims, og Evrópumeisturum Frakka - Jafntefli (29-29)
  • HM 2011 á móti Ólympíu-, heims, og Evrópumeisturum Frakka - 6 marka tap (28-34)
  • EM 2010 á móti Ólympíumeisturum Frakka - 8 marka tap (28-36)
  • ÓL 2008 á móti Frökkum - 5 marka tap (23-28)
  • EM 2008 á móti Evrópumeisturum Frakka - 9 marka tap (21-30)
  • HM 2007 á móti Evrópumeisturum Frakka - 8 marka sigur (32-24)
  • EM 2002 á moti heimsmeisturum Frakka - Jafntefli (26-26)



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.