Heimsmarkmiðin

Árið helgað baráttu gegn nauðungarvinnu barna

Gunnisal

Einu barni af hverjum tíu er þrælað út við hættuleg störf, samkvæmt gögnum frá Alþjóða vinnumálastofnuninni (ILO).

Þótt dregið hafi úr barnaþrælkun á síðasta áratug er enn einu barni af hverjum tíu þrælað út við hættuleg störf, samkvæmt gögnum frá Alþjóða vinnumálastofnuninni (ILO). Árið 2021 er alþjóðlegt ár útrýmingar barnaþrælkunar, samkvæmt samþykkt allsherjarþings Sameinuðu þjóðanna. ILO hyggst ásamt alþjóðasamtökunum Alliance 8.7, vinna að því markmiði á árinu að uppræta nauðungarvinnu barna.

Talan 8.7 vísar í sjöunda undirmarkmið í áttunda heimsmarkmiði Sameinuðu þjóðanna um sjálfbæra þróun: „Gerðar verði tafarlausar og árangursmiðaðar ráðstafanir til þess að útrýma nauðungarvinnu. Nútímaþrælahald og mansal heyri sögunni til og tekið verði fyrir barnaþrælkun og hún bönnuð, þar á meðal herþjónusta barna, og eigi síðar en árið 2025 verði nauðungarvinna barna í allri sinni mynd úr sögunni.“

Á morgun, 21. janúar, verður átakinu formlega ýtt úr vör með fjarfundi sem allir geta fylgjast með á sérstakri vefsíðu sem helguð er útrýmingu barnaþrælkunar. Meðal þeirra sem taka þátt í viðburðinum eru framkvæmdastjórar ILO og UNICEF, Guy Ryder og Henrietta Fore, og Indverski Nóbelsverðlaunahafinn Kailash Satyarthi.

Talið er að rúmlega 150 milljónir barna séu í nauðungarvinnu í heiminum en barnaþrælkun er útbreiddust í Afríku. Í þeirri heimsálfu er talið að 72 milljónir barna séu í ánauð og 62 milljónir í Asíu og Kyrrahafsríkum, langflest barnanna í landbúnaðarstörfum, eða sjö af hverjum tíu. Þá hefur lokun skóla vegna COVID-19 og þrengingar í efnahag margra ríkja leitt til þess að börnum hefur verið þröngvað út á vinnumarkaðinn til að afla tekna fyrir fjölskylduna.

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.



×