Iðnó verður lokað

Rekstraraðilar Iðnó, þeir Þórir Bergsson og René Boonekamp, hafa tekið þá ákvörðun að loka húsinu.

Frá þessu er greint á Facebook-síðu Iðnó en þar segir að það sé með eftirsjá og sorg í hjarta sem þeir verði að tilkynna að Iðnó verði lokað.

„Á þessum fordæmalausu tímum reyndist það fjárhagslega ómögulegt að halda áfram verkefni okkar um að koma fólki saman,“ segir í færslunni.

Er öllum gestum, starfsfólki, flytjendum, framleiðendum birgjum og öllum öðrum sem rekstraraðilar áttu í samstarfi við undanfarin ár þakkað fyrir.

„Það sem liggur fram undan er að vinna hörðum höndum að því að finna lausnir fyrir alla sem tengjast húsinu á margvíslegan hátt og vonumst við til að sjá hurðir þessa menningarhúss opna aftur sem fyrst,“ segir í færslunni á Facebook.