Alexander og Aron fóru báðir yfir hundrað mörkin í gær

Tapleikurinn á móti Ungverjalandi á EM í gær var tímamótaleikur fyrir bæði Alexander Petersson og Aron Pálmarsson.

Alexander Petersson og Aron Pálmarsson náðu þar báðir þeim áfanga að rjúfa hundrað marka múrinn í lokakeppni EM. Þar með hafa sex leikmenn skorað meira en 100 mörk fyrir landsliðið í lokakeppni EM frá því að það tók fyrst þátt fyrir tuttugu árum.

Handknattleikssamband Íslands segir frá þessum tímamótum á fésbókarsíðu sinni.

Alexander skoraði þrjú mörk í leiknum í gær og er þar með búinn að skora 101 mark. Aron var með fjögur mörk er hefur skorað 102 mörk.

Alexander skorað sitt fyrsta mark í lokakeppni EM 2006 í sigurleika á Serbum/Svarfellingum, sem þá tefldu fram sameiginlegu landsliði, 36:31, í Sursee í Sviss 26. janúar 2006. Alls skoraði Alexander þrjú mörk í leiknum.

Fyrsta mark sitt í lokakeppni EM skoraði Aron í sigurleik á Dönum á EM 2010, 27:22, 23. janúar í Linz í Austurríki. Aron skoraði fimm mörk í leiknum.

Eftirtaldir sex leikmenn hafa skoraði yfir 100 mörk fyrir landsliðið í lokakeppni EM:

Guðjón Valur Sigurðsson 278 EM-mörk

Ólafur Stefánsson 184

Snorri Steinn Guðjónsson 143

Róbert Gunnarsson 106

Aron Pálmarsson 102

Alexander Petersson 101