Ístak Ísland auglýst til sölu

Fyrirtækjaráðgjöf Landsbankans hefur auglýst Ístak Ísland ehf., eitt stærsta verktakafyrirtæki landsins, til sölu.

Ístak Ísland ehf. er dótturfélag Ístaks og byggir starfsemi sína á 45 ára reynslu á Íslandi, Grænlandi og í Færeyjum. Félagið sérhæfir sig í verktöku á sviði virkjana, jarðganga, hafnarmannvirkja, stærri iðnaðarmannvirkja og stálsmíði og er einn fárra innlendra valkosta þegar kemur að framkvæmdum og þjónustu við virkjanir og stóriðju.

Ístak hefur verið í eigu Landsbankans síðan danska móðurfélagið Pihl Son varð gjaldþrota september 2013. Bankinn auglýsti fyrirtækið fyrst til sölu í nóvember það ár en sleit síðan formlega söluferlinu í apríl síðastliðnum þegar fimmtán óskuldbindandi tilboðum var hafnað. Eins og fram kom í Fréttablaðinu í byrjun desember var tekin ákvörðun í haust um að skipta Ístaki upp í tvö sjálfstæð fyrirtæki. Ístak Ísland er annað þeirra en hitt heldur utan um starfsemi í Noregi.