Umfjöllun og viðtöl: FH - AIK 0-1 | FH úr leik í Evrópudeildinni

FH féll úr leik í Evrópudeildinni í fótbolta í kvöld þegar liðið tapaði 1-0 fyrir AIK frá Svíþjóð. Liðin gerðu 1-1 jafntefli í fyrri leiknum og því vann sænska liðið 2-1 samanlagt en Martin Lorentzson skoraði eina mark leiksins á 40. mínútu.

AIK hóf leikinn af krafti og pressaði FH hátt. FH átti ekki góða sókn í öllum fyrri hálfleiknum og sænska liðið fékk nokkur fín færi til að skora áður en markið kom. FH-ingar geta nagað sig í handarbökin því markið var hálfger gjöf. Misskilingur leikmanna FH inni í teig varð til þess að Lorentzson fékk boltann utan teigs en auk þess fór boltinn í varnarmann og þaðan í netið.

AIK fékk besta færi sitt úr síðustu sókn fyrri hálfleiks en eins og svo oft var liðið lítt sannfærandi í aðgerðum sínum nálægt marki FH.

FH lék mun betur í seinni hálfleik en vörn AIK hélt vel. FH náði ekki að skapa sér afgerandi dauðafæri en liðið átti þrjú skot utan teigs en ekkert þeirra rataði á markið. Það verður því að segjast sanngjörn úrslit að AIK hafi komist áfram.

Heimir: Það vantaði herslumuninn

„Þetta snérist að mínu mati um það halda út í fyrri hálfleik. Við vorum svolítið á hælunum. Þeir komu út og pressuðu á okkur og náðu að gera það lengur en ég átti von á. Seinni hálfleikurinn var betri en það vantaði herslumuninn þegar kominn var inn á síðasta þriðjunginn en ég held að við höfum staðið okkur vel á móti AIK, atvinnumannaliði," sagði Heimir Guðjónsson þjálfari FH í leikslok.

„Það sem kom mér á óvart var að pressan þeirra var töluvert betri en í Svíþjóð. Þeir komu töluvert ofar með vörnina og voru miklu þéttari. Það sem gerðist í Svíþjóð var að þá náðum við koma okkur í svæði á milli varnar og miðju og halda boltanum en í kvöld voru þeir miklu þéttari heldur en í leiknum úti. Það var helst eftir að Atli Viðar kom inn á að þetta opnaðist aðeins en við náðum ekki að setja mark.

„Ég er mjög sáttur við leikinn í seinni hálfleik. Við reyndum allt. Við hentum Guðmanni fram og fórum í 4-4-2. Mér fannst við líka sjá það á AIK að þeir voru gríðarlega sáttir við að komast áfram.

„Við fengum klaufalegt mark af okkur hálfu og það var pínu svekkjandi. Mér fannst við vera búnir að standa þetta af okkur. Þeir fengu tvö færi sem þeir nýttu ekki og þetta snérist um að komast inn í hálfleikinn með núlli en því miður þá gekk það ekki," sagði Heimir að lokum.

Helgi Valur: Skoruðum grísamark

„Við ætluðum að vinna leikinn og það þarf ekki að vera fallegt. Við náðum þessu mikilvæga marki og það var fínt að fá það í fyrri hálfleik. Þá fengum við smá sjálfstraust," sagði Helgi Valur Daníelsson miðjumaður AIK eftir leikinn.

„Við byrjum af krafti, hlaupum út um allt og eyðum orku. Það tekur á og ef maður nær ekki að skora mark þá tekur það á.

„Við skoruðum grísamark en þeir skoruðu grísamark úti og það jafnaðist út. Seinni hálfleikur var erfiður. Við vissum að þeir myndu fjölga frammi í seinni hálfleik. Auðvitað reyndum viað að halda og spilið í seinni hálfleik var ekki fallegt en það er mikilvægt í Evrópuleikjunum að komast í gegnum þetta.

„Við lögðum upp með að pressa, það var það eina sem við gátum gert í stöðunni. Við hefðum fallið út með markalausu jafntefli. Við vorum ákveðnir í að keyra á þetta. Við vorum búnir að hvíla vel og vorum hressir.

„FH er með mjög gott lið. Við náðum þeim á hælana með pressu í fyrri hálfleik en þeir eru góðir með boltann þegar þeir fá að rúlla honum á jörðinni en sem betur fer náðu þeir spilinu ekki í gang í fyrri hálfleik. Við vorum með leikinn í höndunum í seinni hálfleik en þeir náðu að spila boltanum heldur mikið í seinni hálfleik," sagði Helgi Valur að lokum.