Veruleg brögð af því að veiðimenn vitji ekki leyfa sinna

Þeir hreindýraveiðimenn sem ekki fengu úthlutað leyfum, en eru á biðlista, ættu að fylgjast vel með tölvupósti sínum næstu daga því veruleg brögð eru af því að veiðimenn vitji ekki leyfa sinna.

Tarfaveiðin hófst fyrir rúmum hálfum mánuði og gengur vel að sögn Jóhanns G. Gunnarssonar hjá Umhverfisstofnun á Egilsstöðum. Hann hefur skráð í sínar bækur 91 tarf fallinn af ríflega 600 sem til stendur að fella. Jóhann segir þetta ágæta byrjun. Mikil bleyta hefur verið á hálendinu eftir snjóþungan vetur en veiðimenn hafa ekki lent í teljandi vandræðum vegna hennar.

„Nei ég hef nú ekki heyrt af því, það hefur náttúrulega verið ansi góð tíð undanfarið, með mikilli uppgufun og bráðnun. Það hefur verið heitt til fjalla og kannski bleytan þess vegna verið fljótari að fara. Það er eitthvað um að það séu skaflar í hálendisslóðum ennþá. Það er nú kannski búið að veiða meira á fjarðasvæðunum þar sem lítið reynir á slóðir þar sem menn þurfa að fara beint upp og niður fjöll, og þá gangandi. En það er náttúrulega víða svona bleyta í landi ennþá þannig að menn verða að passa sig þegar menn eru að fara um slóðirnar“, segir Jóhann.

Ekki á morgun heldur hinn hefjast svo veiðar á hreindýrakúm, sem væntanlega fara rólega af stað af því að þær hefjast um Verslunarmannahelgi, en þá hefur veiði verið róleg. Og, nokkur brögð eru af því að menn vitji ekki leyfa sinna.

„Það voru 130 leyfi sem ég úthlutaði núna eftir að menn áttu að vera búnir að klára seinni greiðsluna, og mér sýnist það að ég hafi fengið upp undir 70 af þeim í hausinn til baka. Sem sagt menn sem ég úthlutaði á biðlistana þáðu þau ekki þannig að ég verð að halda áfram að reyna að koma út þessum leyfum, sem er náttúrulega dálítið bagalegt að þurfa að standa í því þegar veiðitíminn er kominn á fullt. En þeir sem eru á biðlistum og eru í sumarfríi, ég ætla allavega að biðja þá um að fylgjast með tölvupóstum sínum og svona, ef þeir telja að þeir séu næstir á biðlista,“ segir Jóhann G. Gunnarsson Egilsstöðum.