Yfirmenn hjá Íslandsbanka sendir í leyfi vegna málsóknar

7. apríl 2010 12:00

Þrír starfsmenn Íslandsbanka hafa verið sendir í leyfi eftir að hafa verið stefnt af skilanefnd Glitnis vegna sex milljarða króna lánveitingar til félags í eigu Jóns Ásgeirs Jóhannessonar og Pálma Haraldssonar, sem voru meðal stærstu hluthafa bankans. Þeim hefur einnig verið stefnt auk Lárusar Welding, fyrrverandi forstjóra Glitnis.

Árni Tómasson, formaður skilanefndar Glitnis, staðfesti í samtali við fréttastofu að aðilum hafi verið birtar stefnur og málið verði þingfest í lok mánaðarins. Hann vildi ekki tjá sig um málið að öðru leyti. Samkvæmt heimildum fréttastofu snýst það um 6 milljarða króna lán til félags í eigu Jóns Ásgeirs Jóhannessonar og Pálma Haraldssonar sem var veitt árið 2008. Þeir voru meðal stærstu hluthafa bankans í gegnum FL Group.

Fjórir starfsmenn Glitnis fengu einnig stefnu. Þeir eru Magnús A. Arngrímsson, fyrrverandi framkvæmdastjóri fyrirtækjasviðs, Rósant Már Torfason, fyrrverandi fjármálastjóri, Guðný Sigurðardóttir, fyrrverandi starfsmaður lánasviðs og Lárus Welding, fyrrverandi forstjóri Glitnis. Magnús og Rósant áttu sæti í áhættunefnd bankans og Guðný var lánastjóri félagsins sem fékk lánið. Þau eru öll lykilstarfsmenn hjá Íslandsbanka í dag og voru send í leyfi þegar þeim voru birtar stefnurnar fyrir páska.

Ekki fást upplýsingar um með hvaða hætti starfsmennirnir tengjast málinu að öðru leyti en því að hafa haft aðkomu að lánveitingunni í gegnum starf sitt.

Stefna Glitnis

Tengdar fréttir

Ráðherra um Glitnisstefnuna: Hljóta að rannsaka þetta sem sakamál

,,Maður bara nuddar augun og trúir þessu varla,“ sagði Steingrímur J. Sigfússon fjármálaráðherra í viðtali við vefritið Smuguna um mál sexmenninganna sem skilanefnd Glitnis stefndi í gær.

8. apríl 2010 14:32

Sakaðir um að hafa misnotað stöðu sína sem hluthafar

Jón Ásgeir Jóhannesson og Pálmi Haraldsson misnotuðu aðstöðu sína sem einir af stærstu hluthöfum Glitnis til að hagnast persónulega um tvo milljarða króna. Lárus Welding forstjóri bankans framkvæmdi skipanir þeirra félaga. Þetta kemur fram í stefnu skilanefndar Glitnis á hendur þremenningunum og þremur starfsmönnum Glitnis. Skilanefndin krefst sex milljarða í skaðabætur.

7. apríl 2010 18:42

Jón Ásgeir vill frávísun í Glitnismálinu

Jón Ásgeir Jóhannesson segist á engan hátt hafa misnotað aðstöðu sína í bankanum. Hann hyggst fara fram á frávísun á stefnu skilanefndar Glitnis á hendur sér.

7. apríl 2010 18:51

Skilanefnd Glitnis stefnir eigendum og stjórnendum bankans

Skilanefnd Glitnis og slitastjórn hafa stefnt Jóni Ásgeiri Jóhannessyni og Pálma Haraldssyni sem voru helstu eigendur bankans, Lárusi Welding fyrrverandi bankastjóra og þremur öðrum lykilstarfsmönnum. Þess er krafist að þeir greiði þrotabúi Glitnis tæplega sex milljarða í bætur. Frá þessu er greint í DV í dag. Þar er haft eftir Árna Tómassyni, formanni skilanefndar Glitnis, að málið sé á lokastigi að hálfu skilanefndarinnar.

7. apríl 2010 09:28

Pálmi segir stefnu gegn sér vera tóma þvælu

Pálmi Haraldsson, fyrrum eigandi Fons, sagði í samtali við fréttastofu Stöðvar 2 og Vísis í dag að það sem kæmi fram í stefnu skilanefndar Glitnis gegn sér væri tóm þvæla.

7. apríl 2010 20:00

Lárus Welding harmar að starfsmönnum hafi verið stefnt

Lárus Welding, fyrrverandi bankastjóri Glitnis, segir viðskipti sem stunduð voru gagnvart Pálma Haraldssyni og félagi hans FS38 ehf, hafa verið unnin af fullum heilindum og samkvæmt reglum bankans.

7. apríl 2010 13:30

Segir Jón Ásgeir hafa verið einhverskonar yfirbankastjóra Glitnis

„Svo kemur það fram í einum póstinum að hann hóti að verða stjórnarformaður fái hann ekki lánið og verði þar af leiðandi einhversskonar yfirbankastjóri,“ sagði lektorinn Vilhjálmur Bjarnason og hluthafi Glitnis í viðtali við Morgunútvarpið á Rás 2 í morgun.

8. apríl 2010 10:03