Höfrungur reyndi að drepa mig og stela kærustunni minni

Nick Young, stjarna LA Lakers, er ekki neinn aðdáandi höfrunga eftir leiðinlega uppákomu í Mexíkó.

Hann var þar í fríi með kærustunni sinni, Iggy Azalea. Hún greindi frá því á Twitter á dögunum að Young væri hræddur við höfrunga og gerði grín að honum.

Blaðamenn voru fljótir að spyrja Young út í hvað hefði gengið á.

„Það var höfrungur að reyna að drepa mig og ég veit ekki af hverju. Hann var að leika við alla aðra og með alls konar kúnstir. Svo var komið að mér að fá smá far með honum," rifjar Young upp.

„Af einhverjum ástæðum togaði hann mig alveg niður á botn. Hann var að reyna að drekkja mér. Ég sá hvað hann var að reyna að gera og losaði mig. Synti síðan upp, henti af mér vestinu og forðaði mér. Hann var að reyna að drepa mig."

Young átti skýringar á því af hverju höfrungurinn hefði verið með stæla við hann en góður við alla aðra.

„Hann var mjög vinalegur við Iggy. Var að kyssa hana og svona. Hann var að reyna að stela kærustunni minni."