Bandarískir olíuframleiðendur borga með lítranum

Samúel Karl Ólason skrifar 20. apríl 2020 18:29

Olíuvinnslustöð í Texas, sú stærsta í Norður-Ameríku. AP/David J. Phillip

Verð bandarískrar olíu hríðféll í dag vegna hárrar birgðastöðu og einstaklega lítillar eftirspurnar. Tunna af West Texas Intermediate lækkaði til að mynda um rúm 50 prósent í dag, samkvæmt frétt BBC. Tunnan kostaði minna en níu dali. Lækkunin er mismikil á milli vísitalna en heilt yfir segja miðlar ytra að verðið hafi ekki verið svo lágt í áratugi.

CNN segir stöðuna svo slæma í Bandaríkjunum að olíufyrirtæki séu nú að borga með olíunni.

Þetta er þrátt fyrir sögulegt samkomulag OPEC, Samtök olíuútflutningsríkja auk annarra samstarfsríkja með Rússland í fararbroddi, frá því í síðustu viku um að draga verulega úr olíuframleiðslu.

Upprunalega byrjaði olíuverð að lækka vegna lítillar eftirspurnar þar sem gripið var til félagsforðunar víða um heim vegna heimsfaraldurs nýju kórónuveirunnar. Þá reyndu yfirvöld Sádi-Arabíu, sem stýra OPCE, að gera samkomulag við Rússa um að draga úr framleiðslu. Það vildu Rússar ekki gera og Sádar byrjuðu þá að auka framleiðslu verulega til að refsa Rússum.

Þessi mikla verðlækkun hefur komið verulega niður á olíuframleiðendum í Bandaríkjunum, þar sem framleiðslan er dýrari en annars staðar.

Sjá einnig: Í verðstríði Sáda og Rússa, tapa Bandaríkin

Sérfræðingar sem BBC ræddi við, segja að þrátt fyrir að OPEC og Rússar hafi sammælst um að draga úr framleiðslu um allt að fimmtung, dugi það ekki til til að ná aftur jafnvægi á mörkuðum. Eftirspurnin hafi dregist of mikið saman.

Því sé ekki einungis ósvarað hvort olía sem dælt verði úr jörðu verði notuð, heldur einnig hvort allir olíutankar heimsins fyllist áður en eftirspurnin tekur við sér.

Bandaríkin Bensín og olía

Tengdar fréttir

OPEC-ríkin ná sögulegu samkomulagi um samdrátt í olíuframleiðslu

OPEC, Samtök olíuútflutningsríkja auk annarra samstarfsríkja með Rússland í fararbroddi, hafa komist að samkomulagi um að draga verulega úr olíuframleiðslu til að reyna að stemma stigu við lækkun olíuverðs.

13. apríl 2020 11:00

Olíuiðnaðurinn aldrei upplifað annað eins áfall og nú

Öll spjót standa nú á olíuiðnaðinum sem hefur aldrei upplifað annað eins áfall og nú vegna kórónuveiruheimsfaraldursins. Alþjóðaorkumálastofnunin varar við því að áhrifin á sum viðkvæm olíuútflutningsríki eigi eftir að verða alvarleg.

2. apríl 2020 11:14

Sádar boða enn meiri olíuframleiðslu í verðstríði við Rússa

Útlit er fyrir enn frekari lækkun á heimsmarkaðsverði á olíu eftir að Sádar tilkynntu að þeir ætluðu að framleiða metmagn af olíu í apríl. Þeir standa nú í verðstríði við Rússa sem vildu ekki samþykkja samdrátt í framleiðslu sem Sádar og OPEC vilja til að bregðast við áhrifum kórónuveirunnar.

10. mars 2020 16:41

Í verðstríði Sáda og Rússa, tapa Bandaríkin

Bæði yfirvöld Rússlands og Sádi-Arabíu segjast tilbúin í langvarandi átök um olíuverð.

11. mars 2020 13:39

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.