Handbolti

Leikmenn ÍR ósáttir við að kvennaliðið hafi verið lagt niður: „Ógeðslega sárar og reiðar“

Ingvi Þór Sæmundsson skrifar
Margrét Valdimarsdóttir, leikmaður ÍR, er ekki ánægð með vinnubrögð handknattleiksdeildar félagsins.
Margrét Valdimarsdóttir, leikmaður ÍR, er ekki ánægð með vinnubrögð handknattleiksdeildar félagsins. mynd/stöð 2 sport

Leikmenn kvennaliðs ÍR í handbolta eru ósáttir við þá ákvörðun handknattleiksdeildar félagsins að draga liðið úr keppni fyrir næsta tímabil. Leikmenn ÍR voru ekki hafðir með í ráðum þegar komist var að þessari niðurstöðu. Þeir halda í vonina um að kvennaliðið fái að keppa áfram á Íslandsmótinu.

„Við fengum póst á Facebook. Kiddi [þjálfari ÍR] var búinn að hringja í nokkra leikmenn kvöldið áður og láta þá vita. En stór hluti hópsins fékk ekki að vita þetta fyrr en það kom tilkynning frá formanninum á Facebook,“ sagði Margrét Valdimarsdóttir, leikmaður ÍR, í samtali við Svövu Kristínu Grétarsdóttur í Sportinu í dag.

„Því miður lét enginn vita og okkar tilfinning er að ekki hafi verið búið að reyna allt sem hægt var að reyna. Það var ekki búið að tala við okkur, ekki búið að fá okkur til að koma í fjáröflun af fullum krafti eða láta vita að fjárhagsvandræðin væru af þessari stærðargráðu.“

Hún er vægast sagt ósátt með þessa ákvörðun handknattleiksdeildar ÍR, að leggja kvennaliðið niður.

ÍR er í 6. sæti Grill 66 deildar kvenna.mynd/ír

„Ég var ógeðslega sár og reið. Ég hef þjálfað ungu stelpurnar og verið í liðinu síðan það var sett upp síðast. Þetta er stanslaus barátta fyrir kvennahandbolta. Við erum ógeðslega sárar og reiðar og verst er að við höfum ekki fengið að gera neitt í þessu; ekki að berjast fyrir því kvennaliðinu verði haldið uppi,“ sagði Margrét. 

Hún efast um að rekstur kvennaliðsins sé að sliga handknattleiksdeild ÍR.

„Þetta er ekki dýrt lið að reka. Þetta er ekki sambærilegt við karlaliðið. Ég held að með smá baráttu og fá fólkið með hefði þetta ekki þurft að fara svona. Við erum að reyna að koma í veg fyrir að þetta fari svona. Við erum að sjá hvort við getum ekki nýtt meðbyrinn. Það er fullt af fólki sem er reitt og fullt af fólki sem er tilbúið að leggja þessu lið.“

Margrét segir að það hafi neikvæð áhrif á allt starf ÍR að vera ekki með kvennalið.

„Ég myndi halda að yngri flokkarnir brotni að einhverju leyti við að missa meistaraflokkinn. Mér finnst skipta máli að það sé meistaraflokkur í ÍR, að ÍR sé bæði með karla- og kvennalið. Það á að vera rekstur á báðu, ekki bara karlaliði og svo kvennaliði til viðbótar. Ég trúi ekki að það séu engin fyrirtæki eða aðilar þarna úti sem vilja styrkja kvennahandbolta,“ sagði Margrét sem er ekki á launum og segir að það sama eigi væntanlega við um flesta leikmenn kvennaliðsins.

Margrét segist vera þakklát fyrir stuðninginn sem ÍR hefur fengið undanfarna daga. Bikarmeistarar Fram buðust m.a. til að spila fjáröflunarleik við ÍR í Austurberginu.

„Vonandi getum við haldið þessu liði úti og að sjálfsögðu þökkum við alla hjálp. Handboltasamfélagið er ekki tilbúið að samþykkja að kvennaliði sé hent út. Það er geggjað og stuðningurinn er frábær,“ sagði Margrét.

Viðtalið við Margréti má sjá í heild sinni hér fyrir neðan.

Klippa: Sportið í dag - Ekki rætt við leikmenn ÍR áður en kvennaliðið var lagt niður

Sportið í dag er á dagskrá á Stöð 2 Sport alla virka daga klukkan 15.00. Upptökur af fyrri þáttum má nálgast á sjónvarpsvef Stöðvar 2. Stöð 2 Sport er hluti af Sportpakkanum.


Tengdar fréttir

ÍR dregur kvenna- og U-liðið úr keppni

Handknattleiksdeild ÍR hefur ákveðið að draga kvenna- og U-lið félagsins úr keppni á næstu leiktíð. Þetta staðfesti Sigurður Rúnarsson, formaður handknattleiksdeildar ÍR, í Sportinu í dag.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.