Erlent

Segir mun fleiri hafa látist í Frakklandi en opinberar tölur gefi til kynna

Eiður Þór Árnason skrifar
Sjúklingur með kórónuveiruna er fluttur af Mulhouse spítalanum í austurhluta Frakklands.
Sjúklingur með kórónuveiruna er fluttur af Mulhouse spítalanum í austurhluta Frakklands. Ap/Jean-Francois Badias

Raunverulegur fjöldi þeirra sem hafa látist í Frakklandi af völdum kórónuveirunnar er mun hærri en opinberar tölur gefa til kynna. Þetta segir Frederic Valletoux, sem er í forsvari fyrir samtök franskra spítala.

Að hans sögn er skýringin sú að tölfræðin sem frönsk stjórnvöld uppfæri daglega taki einungis til þeirra sem láti lífið inni á spítölum og ekki þeirra sem deyi í heimahúsum eða á hjúkrunarheimilum.

„Við vitum einungis um tölurnar sem spítalarnir veita. Aukningin sem við sjáum í opinberum gögnum er nú þegar stórfelld en hinar raunverulegu tölur myndu án vafa vera mun hærri ef við tækjum saman það sem er að gerast á hjúkrunarheimilum og það fólk sem lætur lífið á heimili sínu,“ sagði Valletoux á frönsku útvarpsstöðinni France Info.

1.102 hafa nú látið lífið í Frakklandi vegna COVID-19 sjúkdómsins sem kórónuveiran veldur og eru yfir 22 þúsund staðfest smit í landinu.

Miðpunktur faraldursins í Frakklandi er í Grand Est héraðinu þar sem flestir hafa látið lífið vegna veirunnar í Evrópu á eftir Ítalíu og Spán.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×