Innlent

„Verst af öllu er að þurfa að bíða en við verðum að vona það besta“

Vésteinn Örn Pétursson og Berghildur Erla Bernharðsdóttir skrifa
Páll segir Seyðfirðinga marga kvíðna því að snúa aftur í bæinn.
Páll segir Seyðfirðinga marga kvíðna því að snúa aftur í bæinn. Vísir/Samsett

Páll Thamrong Snorrason segir aðgerðir á Seyðisfirði í gærkvöldi hafa gengið vel en fólk sé margt óttaslegið og kvíðið fyrir næstu skrefum.

 Páll þurfti, líkt og aðrir íbúar Seyðifsfjarðar, að yfirgefa heimili sitt í gærkvöldi, þar sem ákveðið var að rýma allan bæinn vegna skriðuhættu, eftir að stórar skriður féllu á bæinn í gær með mikilli eyðileggingu.

„Það gekk rosalega vel. Fólk var mjög rólegt, það var enginn æsingur. Fólk sýndi þolinmæði og gerði bara það sem það þurfti að gera,“ segir Páll í samtali við fréttastofu um rýmingaraðgerðir gærkvöldsins.

Hann segir að fyrsta skref hafi verið að mæta í fjöldahjálparstöðina í Herðubreið þar sem nöfn allra og kennitölur hafi verið tekin niður. Þannig hafi verið gerð grein fyrir öllum í bænum áður en íbúar héldu annað.

„Svo fengum við góðar leiðbeiningar frá fólki sem var að vinna fyrir björgunarsveitir og Rauða krossinn. Svo pökkuðum við bara því sem við máttum taka og fórum yfir,“ segir Páll sem fór ásamt fjölskyldu sinni í sumarbústað skammt frá Egilsstöðum og dvaldi þar í nótt.

Skýringarmynd sem Páll setti á Facebook sýnir afleiðingar hamfaranna í gær.Facebook/Páll Thamrong

Lá andvaka og beið frétta

Hús Páls var ekki á upphaflega skilgreindu hættusvæði vegna skriðanna en hann þurfti engu að síður að yfirgefa Seyðisfjörð eftir að tekin var ákvörðun um að rýma allan bæinn. Páll segir þá að erfitt hafi verið að festa svefn í gærkvöldi.

„Ég lá bara andvaka og fylgdist með fréttum til að sjá hvort einhverjar breytingar hefðu orðið eða eitthvað gerst,“ segir Páll, sem kveðst ekki hafa sofið í mikið meira en þrjá klukkutíma í nótt.

Páll segir íbúa slegna vegna atburðarásarinnar í gær. Seyðfirðingar séu slegnir og margir kvíði því að fara heim aftur, enda ollu skriðurnar mikilli eyðileggingu í bænum. Páll segir biðina eftir nýjum upplýsingum þá versta.

„Verst af öllu er að þurfa að bíða en við verðum að vona það besta og horfa björtum augum til framtíðar. En þetta verður stór breyting á næstunni, ég er smá óttasleginn og ég er í smá sjokki. Maður er ekki hissa, það er 2020. Hvað gerist næsta ár, það er ég ekki spenntur að vita,“ segir Páll.

Við fjöldskylda erum komnir á öruggan stað og vonum að allir séu komnir á öruggan stað, við erum allt í lagi auðvitað í...

Posted by Páll Thamrong Snorrason on Friday, 18 December 2020

Tengdar fréttir

Seyðfirðingar allir komnir með svefnpláss fyrir nóttina

Seyðfirðingar eru allir komnir til Egilsstaða í fjöldahjálparstöð Rauða krossins sem opnuð var í grunnskólanum þar. Að sögn Rögnvaldar Ólafssonar, aðstoðaryfirlögregluþjóns hjá almannavarnadeild ríkislögreglustjóra, hafa allir fengið rúmpláss fyrir nóttina og enginn mun þurfa að halda til í skólanum í nótt.

Hol­ræsin hafa ekki undan og slökkvi­liðið reynir að bjarga kjöllurum frá vatns­skemmdum

Slökkviliðsmenn á Seyðisfirði hafa undanfarna daga átt fullt í fangi með að dæla vatni upp úr kjöllurum og að dæla vatn úr holræsum sem hafa ekki haft undan. Haraldur Geir Eðvaldsson, slökkviliðsstjóri á Seyðisfirði segir að enn sé mikið eftir og að starf slökkviliðsins muni ekki hefjast af alvöru fyrr en íbúar hafa snúið aftur heim til sín.

Um 30 ár síðan heilt bæjar­fé­lag var síðast rýmt

Neyðarástand er í gildi á Seyðisfirði vegna aurskriða sem þar hafa fallið síðustu sólarhringa. Stór skriða féll á byggðina um klukkan hálf fjögur á föstudag sem hreif með sér hús sem jafnaðist nánast við jörðu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×