Viðskipti innlent

Forstjórinn seldi allan hlut sinn í Skeljungi

Kolbeinn Tumi Daðason skrifar
Árni Pétur Jónsson er forstjóri Skeljungs.
Árni Pétur Jónsson er forstjóri Skeljungs.

Árni Pétur Jónsson, forstjóri Skeljungs, seldi í morgun hlutabréf í Skeljungi fyrir 20 milljónir króna. Hann átti 2,25 milljónir hluta og seldi á genginu 8,78 í gegnum félag sitt Hái klettur.

Daníel Orri Árnason, sonur Árna Péturs, sem átti 100 þúsund hluti seldi þá á genginu 8,75. Þeir feðgar eiga enga hluti í Skeljungi eftir söluna í morgun. Viðskiptablaðið greindi fyrst frá.

Félag sem er meðal annars að stórum hluta í eigu Ingibjargar Pálmadóttur stendur fyrir yfirtökutilboði í Skeljung. Tilboðsyfirlitið var opinberað í gær og gildir í fjórar vikur.

Tilboðið hljóðar upp á 8,315 krónur á hvern hlut. Gengi bréfa Skeljungs við lokun markaða á föstudag var 8,8 krónur á hlut. Feðgarnir seldu sína hluti á örlítið læra gengi.

Ingibjörg og Jón Ásgeir í yfirtöku

Félögin þrjú sem hyggja á yfirtöku Skeljungs eru 365 hf, RES 9 og RPF. Félögin sameinast í félaginu Streng ehf þar sem 365 og RES 9 eiga 38% hlut hvort félag og Loran 24% hlut.

Ingibjörg Pálmadóttir á félagið 365 sem er eitt þriggja félaga sem stefnir á yfirtöku í Skeljungi.Vísir/Vilhelm

365 hf er í eigu Ingibjargar Pálmadóttur. Jón Ásgeir Jóhannesson, eiginmaður hennar, er stjórnarformaður í Skeljungi. Þá er hann varamaður í stjórn 365.

Hjónin Sigurður Bollason og Nanna Björk Ásgrímsdóttir eiga 50% RES 9 í gegnum annað félag. Hin 50% eru í eigu erlends félags, No 9 Investments Limited.

Ætla að skrá Skeljung úr Kauphöllinni

Fram kemur í frétt Viðskiptablaðsins að RPF sé í jafnri eigu Loran ehf, í eigu Þórarins A. Sævarssonar stjórnarmanns í Skeljungi, og Premir eignarhaldsfélags, sem er í eigu Gunnars Sverris Harðarsonar.

Jón Ásgeir Jóhannesson er stjórnarformaður Skeljungs.Vísir/Vilhelm

Árni Pétur var ráðinn forstjóri Skeljungs eftir að Jón Ásgeir var kominn inn í stjórn félagsins. Þeir hafa unnið mikið saman undanfarin ár. Jón Ásgeir var forstjóri og síðar stjórnarformaður Baugs Group sem átti Haga var og var stærsti hluthafinn í Teymi þegar Árni Pétur stýrði því fyrirtæki.

Yfirtökuskylda í Skeljungi varð þann 8. nóvember þegar samstarfsaðilarnir þrír náðu rúmlega 30% eignarhlut í Skeljungi. Fram kemur í tilboðsyfirlitinu að samstarfsaðilarnir deili sameiginlegri framtíðarsýn. Til stendur meðal annars að skrá Skeljung úr Kauphöllinni.

Framtíðarsýn yfirtökuhópsins má sjá að neðan.

Samstarfsaðilarnir sem allir eru hluthafar í Skeljungi við útgáfu á tilboðsyfirliti þessu deila sameiginlegri framtíðarsýn fyrir félagið. Samstarfsaðilarnir lýstu yfir samstarfi sín á milli þann 8. nóvember 2020 og lögðu eignarhluti sína inn í félagið Streng. Þar sem sameiginlegur atkvæðaréttur samstarfsaðilanna fór yfir 30% myndaðist yfirtökuskylda skv. 100. gr. vvl.

Tilboðsgjafi telur ljóst að rekstrarumhverfi Skeljungs komi til með að taka grundvallarbreytingum á næstu árum. Tækniþróun er hröð, rafbílum fjölgar á götunum og fyrir liggur að stjórnvöld stefna að því að auka hlutdeild endurnýjanlegra orkugjafa í samgöngum. Reykjavíkurborg hefur jafnframt þá yfirlýstu stefnu að fækka bensínstöðvum. Eldsneytissala er um 80% tekna Skeljungs og félagið því næmt fyrir fyrirséðum breytingum hvað orkuskipti varðar. Fyrir liggur að sambærilegar áskoranir eru í rekstri félagsins í Færeyjum enda eru orkuskipti einnig hafin þar sem hefur bæði áhrif á eldsneytissölu og orku til húshitunar.

Það er mat tilboðsgjafa að breyttar aðstæður kalli á áframhaldandi hagræðingu og breytingar á kjarnastarfsemi Skeljungs. Tilboðsgjafi hefur uppi áætlanir um slíka vegferð. Skeljungur þarf að auka fjölbreytni tekjustofna enda eru tækifæri félagsins til innri vaxtar takmörkuð við þessar aðstæður. Því telur tilboðsgjafi að reksturinn þurfi að styrkja með kaupum á rekstrareiningum sem skapa samlegð, eins og tækifæri gefast til. Tilboðsgjafi stefnir einnig að sölu lóða, fasteigna og rekstareininga félagsins ásamt hagræðingu starfsstöðva sem ekki falla að framtíðar kjarnastarfsemi félagsins við fyrsta tækifæri þegar markaðsaðstæður leyfa. Þá telur tilboðsgjafi litla samlegð vera á milli starfsemi Skeljungs á Íslandi og í Færeyjum sem gæti leitt af sér sölu einstakra rekstareininga í öðru eða báðum löndum. Framundan eru því óumflýjanlega breytingar hjá Skeljungi að mati tilboðsgjafa.

Íslandsbanki og Arion banki ábyrgjast yfirtökutilboð tilboðsgjafa í samræmi við 103 gr. vvl. Kaup tilboðsgjafa á hlutum í Skeljungi í yfirtökutilboðinu verða fjármögnuð með sambankaláni frá Íslandsbanka og Arion banka ásamt fjármögnun frá öðrum lánveitendum. Lántaka tilboðsgjafa ræðst af fjárhæð samþykktra tilboða hjá öðrum hluthöfum Skeljungs samkvæmt yfirtökutilboðinu. Athygli er vakin á því að endurgreiðsluferli lána tilboðsgjafa gerir ráð fyrir sölu lóða, fasteigna og rekstrareininga Skeljungs á næstu misserum og í því tilliti er jafnframt gert ráð fyrir að fjármunum verði í auknu mæli úthlutað til hluthafa með arðgreiðslum eða lækkun hlutafjár félagsins, og þar með minnka efnahagsreikning félagsins.

Það er mat tilboðsgjafa að nauðsynlegar hagræðingaraðgerðir og endurskipulagning í rekstri Skeljungs geti valdið sveiflum í afkomu til millilangs tíma. Auk þess telur tilboðsgjafi að skráning félagsins á skipulegum verðbréfamarkaði skapi óhagræði. Beinn kostnaður félagsins sem má rekja til skráningar þess á verðbréfamarkað er áætlaður um 8% af hagnaði. Auk þess mun efnahagsreikningur félagsins dragast saman á næstu misserum við mögulega sölu eigna eða rekstrareininga gangi áætlun tilboðsgjafa eftir.

Flot á hlutabréfum félagsins hefur minnkað jafnt og þétt samhliða kaupum tilboðsgjafa á hlutum í félaginu.

Komi til þess að hlutafé í félaginu safnist á enn færri hendur er það líklegt til að hafa neikvæð áhrif á seljanleika bréfanna.Tilboðsgjafi telur í ljósi þeirra breytinga og áskoranna sem félagið stendur frammi fyrir að því sé betur farið utan verðbréfamarkaðar og áformar að afskrá félagið af skipulegum verðbréfamarkaði þegar tækifæri gefst til. Tilboðsgjafi telur að framtíðarsýn Skeljungs á tímum sem þessum sé best borgið í höndum samstillts hluthafahóps sem getur tekið skjótar ákvarðanir.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
SYN
5,33
12
19.164
BRIM
4,76
17
260.514
ORIGO
2,41
18
252.150
VIS
2,21
6
57.872
EIM
2,05
2
15.025

Mesta lækkun dagsins


Félag
Br.%
Fjöldi
Velta*
ICEAIR
-1,2
70
49.732
HAGA
-1,01
8
100.242
ARION
-0,79
23
160.956
MAREL
-0,68
12
30.098
LEQ
-0,43
2
5.475
Velkomin á Vísi. Þessi vefur notar vafrakökur. Sjá nánar.