Netapótek umfangsmikið verkefni en gott fyrir neytendur

„Fólk sleppur við biðtíma í apóteki eftir að lyfseðlar eru afgreiddir, sambærilegt og þegar pizza er pöntuð á netinu," segir Hákon Steinsson framkvæmdastjóri Lyfjavers meðal annars um þá kosti sem fólk mun upplifa þegar netapótek Lyfjavers mun opna innan tíðar. Lyfjaver var brautryðjandi í tölvustýrðri vélskömmtun á Íslandi og eins vakti það athygli á sínum tíma þegar fyrirtækið fór að nota róbóta til að taka saman lyfjapakkningar til afgreiðslu. 

Að hans sögn er netapótek mjög umfangsmikið verkefni að ráðast í. „Mjög flókið getur verið fyrir almenna lyfjaneytendur að skilja verðlag lyfja og er verðið oft mismunandi milli þess sem lyfseðlar eru leystir út. Þar spilar mest inn í flókið niðurgreiðslukerfi á lyfjum þar sem í eitt skiptið greiðir viðskiptavinur 100% hluta í lyfjum en í næsta 15% eða minna,“ segir Hákon.

Í dag og í fyrramálið rýnir Atvinnulífið á Vísi í þróun netverslunar í kjölfar kórónufaraldursins. Tekin verða til umfjöllunar þrjú dæmi um netverslun ólíkra fyrirtækja og hvaða þýðingu hún hefur nú þegar kórónufaraldur hefur öllu breytt. Hér er annað viðtalið af þremur.

Tæknin hefur gert mikið nú þegar

Að sögn Hákonar hefur tæknin nú þegar gert heilmikið fyrir Lyfjaver og viðskiptavini fyrirtækisins. Nefnir hann ávinninginn af notkun róbóta sem dæmi.

„Auk þess að vera mikill vinnusparnaður fyrir starfsfólk Lyfjavers að sleppa við að raða lyfjum í skúffur og sækja lyf í skúffur eins og í hefðbundnum apótekum, þá er mikið öryggi fólgið í að róboti afhendi strikamerktar pakkningar,“ segir Hákon.

Þá segir hann minni líkur á mistökum. Lyfjapakkningar séu oft á tíðum mjög álíka í útliti, sérstaklega þegar um er að ræða sama lyfið en með mismunandi styrk. 

Róbotinn horfir fram hjá því þar sem hann þekkir strikamerki ásamt útliti og stærð pakkninga og afhendir því ávallt réttar pakkningar samkvæmt því sem kemur fram á lyfseðli,“ 

segir Hákon.

Með aðstoð róbóta meðhöndlar fyrirtækið um þrjátíu þúsund lyfjapakkningar á mánuði. Þá hafi vélskömmtun og myndeftirlit einnig skilað miklum ávinningi.

„Vélskömmtun á lyfjum er mikill vinnusparnaður fyrir starfsfólk hjúkrunarheimila sem áður þurftu að tína til lyf fyrir hvern íbúa daglega,“ segir Hákon og skýrir út að ferlið gangi þannig fyrir sig að lyfjafræðingar og lyfjatæknar forvinna og yfirfara lyfjaupplýsingar sem í framhaldi eru nýttar til að vélskammta þeim lyfjum á þeim tíma sem einstaklingar eiga að taka lyfin. Með þessu jókst gæðaeftirlitið um svo mikið því myndeftirlitsvélar taka mynd af hverjum einasta lyfjaskammti og bera saman við gagnagrunn af töflumyndum.

„Stöðluð vélskömmtun lyfja eykur öryggi mikið þar sem hún kemur í veg fyrir mannleg mistök við tínslu lyfja. Tíðni raunverulegra villna það sem af er ári er 0,00011%,” segir Hákon.

Þá bendir Hákon á hvernig vélskömmtun tryggir betur hreinlæti og snertilausar lausnir sem allir hafa nú kynnst hversu miklu máli skipta.

Netapótek næsta skref

Eins og áður sagði mun Lyfjaver opna netapótek á næstu dögum. Þar munu viðskiptavinir geta séð betur hvert nákvæmt lyfjaverð er með greiðsluþátttöku Sjúkratrygginga Íslands en einnig verður möguleiki á því fyrir fólk að gera sjálft verðsamanburð.

„Mismunandi verð á samheitalyfjum og hvaða samheitalyf er ódýrast hverju sinni talsverð áhrif á lyfjakostnað. Kostnaður einstaklings getur hæglega tvöfaldast ef hann velur ekki ódýrasta samheitalyfið,“ segir Hákon. Þá segir hann að það einnig af hinu góða að viðskiptavinir geti með auðveldari hætti gert verðsamanburð á milli apóteka en það er einn kosturinn við netverslun.

Netapótek mun líka gagnast landsbyggðinni.

Einokun hefur ríkt á lyfjamarkaði á landsbyggðinni. Fleiri en ein lyfjabúð í þéttbýli er eingöngu að finna á höfuðborgarsvæðinu, Akureyri, Selfoss, Reykjanesbæ og Akranesi,“ 

segir Hákon. Að hans sögn verður netapótek Lyfjavers lágvöruverðsapótek. Með netverslun fái neytendur apótekin heim til sín, hvar svo sem þeir eru búsettir sjálfir.

„Í fjölda minni byggðarlaga á Íslandi er ekkert starfandi apótek,“ segir Hákon.