Erlent

Ríkis­stjórnar­myndun í Líbanon farin út um þúfur

Kjartan Kjartansson skrifar
Mustapha Adib sem var tilnefndur forsætisráðherra Líbanons. Hann gaf stjórnarmyndun upp á bátinn í dag.
Mustapha Adib sem var tilnefndur forsætisráðherra Líbanons. Hann gaf stjórnarmyndun upp á bátinn í dag. Vísir/EPA

Tilraunir til þess að mynda nýja ríkisstjórn í Líbanon eru farnar út um þúfur eftir að Mustapha Adib, tilnefndur forsætisráðherra, sagðist ekki vilja leiða ríkisstjórn sem væri dæmd til þess að springa. Líbanon berst nú í bökkum efnahagslega eftir gríðarlega sprengingu í höfuðborginni Beirút í síðasta mánuði og kórónuveirufaraldurinn.

Fyrri ríkisstjórn hrökklaðist frá völdum vegna mikillar reiði yfir sprengingunni en fjöldamótmæli voru landlæg fyrir. Í ljós kom að mikið magn sprengifims efnis hafði verið geymt með óöruggum hætti á hafnarsvæðinu um árabil þrátt fyrir viðvaranir embættismanna um að hætta stafaði af því. Að minnsta kosti 190 manns fórust og 6.000 slösuðust í sprengingunni sem lagði stóran hluta borgarinnar í rúst.

Frönsk stjórnvöld höfðu hvatt stjórnmálaflokka í Líbanon til að ná fljótt saman um nýja ríkisstjórn og bauðst Emmanuel Macron, forseti Frakklands, til þess að halda ráðstefnu um neyðaraðstoð við landið um miðjan október. Líbanon var frönsk nýlenda til ársins 1943.

Adib, sem er súnnímúslimi, var tilnefndur forsætisráðherra í lok ágúst og sagðist stefna að umbótum og að fá neyðarlán frá Alþjóðagjaldeyrissjóðnum. Breska ríkisútvarpið BBC segir að viðræður um myndun ríkisstjórnar hafi standrað á kröfum flokka sjíamúslima, þar á meðal Hezbollah, um að þeir fengju fjármálaráðuneytið og að velja ráðherra í ríkisstjórnina. Adib vildi aftur á móti skipa ópólitíska fagráðherra.

Dró Adib sig í hlé frá því að stýra ríkisstjórnarmyndun eftir fund með Michel Aoun, forseta, í dag. Bað hann þjóðina afsökunar á að honum hafi ekki auðnast að koma saman hópi umbótafólks til þess að bjarga landinu. Hann vildi hins vegar ekki stýra ríkisstjórn sem væri dauðadæmd frá upphafi.


Tengdar fréttir

Annar stór eldsvoði blossar upp á höfninni í Beirút

Eldur logar nú í olíu- og dekkjageymslu á hafnarsvæðinu í Beirút, aðeins mánuði eftir að gríðarlega öflug sprenging þar olli mannskaða og eignartjóni. Engar fréttir hafa borist af mannskaða nú en eldurinn er sagður hafa slegið borgarbúa óhug.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.