Dusty dró tennurnar úr mulningsvél KR

KR sendi frá sér skýr skilaboð í fyrstu lotu þegar að liðsmenn rifu Dusty í sig, með þá 7homsen (Thomas Thomsen) hnifaði EddezeNNN (Eðvarð Þór Heimisson) fremsta í flokki.

Leikmenn Dusty voru fljótir að svara fyrir sig þegar þeir stálu annarri lotu og vopnunum af KR-ingum. Við tóku jafnar lotur þar sem Dusty spilaði sig þó ítrekað í gegnum vörn KR.

StebbiC0C0 (Stefán Ingi Guðjónsson) leiddi Dusty en hökt var á mulningsvél KR-inga sem komst ekki í gang í fyrri hálfleik. Staðan að honum loknum 10-5, Dusty í vil.

KR fann taktinn þegar þeir svarthvítu byrjuðu seinni hálfleik á kröftugri leiftursókn á sprengjusvæði A. Midgard (Heiðar Flóvent Friðriksson) lét finna fyrir sér og var mulningsvél KR-inga komin í gang. 

KR spilaði sóknina (terrorist) mun betur en þeim gekk að finna sig í vörn í fyrri hálfleik. Dugði þessi spilamennska KR-ingum til að vinna fimm lotur í röð og ná að jafna metin í leiknum.

En Dusty komst aftur inn í leikinn. EddezeNNN, sem hafði verið lítill í sér eftir hnífinn í fyrri hluta, lét til sín taka. Er liðin skiptust á lotum var hann að opna loturnar með mikilvægum fellum og koma sínum mönnum í yfirtölu.

KR-ingar spyrntu vel á móti og gáfu ekkert eftir. En heitt lið Dusty var of mikið fyrir KR að þessu sinni. Lokatölur 16-13 fyrir Dusty sem náði þar með að velta KR úr sessi af toppi Vodafonedeildarinnar.