Bílar

FÍB skorar á stjórnvöld að innleiða reglugerð um takmarkanir á mengun frá bílum

Kristinn Ásgeir Gylfason skrifar
Tesla Model 3 bíll fyrir utan risarafhlöðuverksmiðju Tesla í Nevada.
Tesla Model 3 bíll fyrir utan risarafhlöðuverksmiðju Tesla í Nevada.

Félag íslenskra bifreiðaeigenda, FÍB, skorar á íslensk stjórnvöld að innleiða Evrópu reglugerð um takmarkanir á mengun frá bílum. Innleiðingin hefur dregist úr hófi fram, sem gæti haft það í för með sér að framleiðendur selji ekki raf- eða hreinorkubíla hingað til lands og jafnvel ekki heldur til Noregs.

Í fréttatíma á RÚV í fyrra kvöld kom fram í máli Runólfs Ólafssonar, framkvæmdastjóra FÍB, að Evrópusambandið hafi samþykkt harðari reglur og auknar kröfur á bílaframleiðendur varðandi útblástur bíla samkvæmt frétt á heimasíðu FÍB.

Fram kom að í ár megi meðal framleiðsla hvers bílaframleiðanda ekki menga meira en sem nemur 95 gr. á kílómetra af koltvísýringi. Háar sektir liggi við brotum sem þessum og hefðu framleiðendur því keppst við að fara yfir í framleiðslu á hreinorku bílum. EFTA-ríkin, Ísland, Noregur og Liechtenstein, sem eru hluti af EES samningnum þurfa öll að samþykkja það sem fer inn í samninginn.

Runólfur Ólafsson, framkvæmdstjóri Félags íslenskra bifreiðaeigenda.Stöð 2/Björn Sigurðsson.

„Eftir upplýsingum sem við höfum frá Noregi hafa aðilar þar áhyggjur að því að einhverra hluta vegna hafa Íslendingar dregið lappirnar með að samþykkja þetta regluverk frá Evrópu sem lítur að því að draga úr útlosun frá ökutækjum. Það sé í raun þvert á samþykktir stjórnvalda í átaki í þeim efnum,“ sagði Runólfur Ólafsson í samtali á RÚV.

Runólfur sagði enn fremur að framleiðendur sæju sér ekki hag í því að flytja hingað til lands raf- eða hreina raforkubíla því þeir telji ekki með í kvóta þeirra og sama gæti gilt fyrir Noreg. Runólfur segir að samkvæmt upplýsingum hafi málið beðið afgreiðslu hjá Alþingi frá því í október á síðasta ári.

„Við skorum á stjórnvöld að standa við sínar skyldur og undirrita þetta samkomulag til að tryggja það að hér verði áfram nægt framboð á raf- og hreinorkubílum á markaðnum,“ sagði Runólfur Ólafsson.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.



×