Viðskipti innlent

Play leggst alfarið gegn ríkisaðstoð við Icelandair

Heimir Már Pétursson skrifar
Forstjóri Play segir það skekkja samkeppni á flugmarkaði ef ríkið veiti Icelandair aðstoð með ábyrgð á lánum upp á allt að 15 milljarða króna.
Forstjóri Play segir það skekkja samkeppni á flugmarkaði ef ríkið veiti Icelandair aðstoð með ábyrgð á lánum upp á allt að 15 milljarða króna. Vísir/Vilhelm

Forstjóri flugfélagsins Play gerir miklar athugasemdir við frumvarp fjármálaráðhera um ríkisábyrgð á lánalínum fyrir Icelandair. Ábyrgðin feli í sér mikla áhættu fyrir ríkissjóð og skekki samkeppnisstöðu á flugmarkaði.

Ellefu umsagnir hafa borist til efnahags- og viðskiptanefndar Alþingis við frumvarp fjármála- og efnahagsráðherra til fjáraukalaga, þar sem gert er ráð fyrir ríkisábyrgð að verðmæti allt að 15 milljarða til Icelandair Group. Nokkur ferðaþjónustufyrirtæki gera athugasemdir við að veitt verði ríkisábyrgð á lánalínum til Icelandair Group en ekki einungis til flugfélagsins Icelandair. Því Icelandair Group eigi einnig dótturfélög í innanlandsflugi, vöruflutningum sem og ferðaskrifstofurekstri.

Ferðavefurinn Túristi vekur athygli á að Samtök atvinnulífsins og Samtök ferðaþjónustunnar sem styðja frumvarpið hafi breytt áliti sínu og bætt inn eftirfarandi fyrirvara:

„Fjárlaganefnd ætti að skoða hvort rétt sé að ábyrgðinni fylgi þaðskilyrði að húnsé nýtt íflugrekstri einvörðungu, t.d.með lánveitingu til Icelandair ehf., ekki Icelandair Group."

Í áliti flugfélagsins Play, sem enn hefur ekki hafið starfsemi, er tekið undir þetta og síðan gerðar alvarlegar athugasemdir við málið í heild sinni. Í umsögn félagsins sem Arnar Már Magnússon forstjóri félagsins skrifar undir er meðal annars bent á að gjaldið fyrir ríkisábyrgðina sé lægra en gert sé ráð fyrir í viðmiðunum Eftirlitsstofnunar EFTA og framkvæmdastjórnar Evrópusambandsins.

Arnar Már Magnússon segir ríkið ætla að taka lægra gjald fyrir ríkisábyrgðina á lánum til Icelandair en viðmiðanir Eftirlitsstofnunar EFTA og framkvæmdastjórnar Evrópusambandsins geri ráð fyrir og það sem tíðkist á almennum markaði.Vísir/Vilhelm

„Þetta gjald er hærra bæði á almennum markaði og hvernig það hefur tíðkast erlendis í gegnum þessi neyðarlán. Við teljum þetta gjald einfaldlega of lágt,” segir Arnar Már. Með því felist of mikill vilji stjórnvalda til ívilnunar. Almennt leggist Play gegn ríkisaðstoð við Icelandair.

„Við teljum að flugmarkaðurinn eins og aðrir markaðir eigi að vera markaður án ríkisíhlutunar eða ívilnunar. Teljum að það eigi við um flugmarkaðinn sem og aðra markaði,” segir forstjóri Play.

Kórónufaraldurinn hefur seinkað áformum Play um að hefja starfsemi en fari illa fyrir Icelandair flugfélaginu segir Arnar Már flugfélagið með allt tilbúið.

„Hundrað prósent. Við höfum lagt gríðarlega mikla vinnu í uppbyggingu félagsins undanfarna mánuði og höfum þurft að fresta fyrsta flugi sökum covid. En við erum hundrað prósent tilbúin og getum stigið hratt inn. Með frábæran flota af nýjum Airbus flugvélum sem henta gríðarlega vel inn í leiðarkerfið. Eru hagkvæmar og sparsamar á sama tíma,” segir Arnar Már Magnússon.


Tengdar fréttir

Ekki óskað eftir um­sögnum keppi­nauta Icelandair

Fjárlaganefnd Alþingis hefur óskað eftir umsögn alls átján aðila á frumvarpi Bjarna Benediktssonar fjármálaráðherra um ríkisábyrgð á fimmtán milljarða láni til Icelandair Group. Hvorki var óskað eftir umsögn frá Samkeppniseftirlitinu eða samkeppnisaðilum Icelandair.

Funda um ríkisábyrgð og Icelandair í Hörpu

Frumvarp til fjáraukalaga verður rætt á Alþingi á föstudag en Alþingi kemur saman á ný á morgun vegna hins svokallaða „þingstubbs“ sem samið var um í vor.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×