Zlatan við það að gera nýjan samning við Milan

Zlatan Ibrahimovic er við það að skrifa undir nýjan eins árs samning við AC Milan í ítölsku úrvalsdeildinni. Samningurinn hljóðar upp á 6,2 milljónir punda á ári.

Þessi magnaði 38 ára gamli Svíi gekk til liðs við Milan í janúar frá LA Galaxy en hann spilaði áður með Mílanóliðinu frá 2010-2012 þar sem hann vann meðal annars ítölsku deildina árið 2011.

Zlatan skoraði tíu mörk í átján leikjum fyrir félagið í ítölsku deildinni á nýliðnu tímabili og hjálpaði liðinu að komast aftur í Evrópukeppni á nýjan leik. Liðið fór taplaust í gegnum síðustu 12 umferðirnar í deildinni og átti Zlatan eflaust stóran þátt í því. Það eru því gríðarlega jákvæðar fréttir fyrir stuðningsmenn Milan að Zlatan muni framlengja dvöl sína hjá liðinu.

„Ég er ekki hér til að vera lukkudýr. Ég er hér til að ná í úrslit og hjálpa liðinu, þjálfaranum og leikmönnunum að komast á þann stað sem Milan á að vera á,“ sagði Zlatan.