Þingvallavatn hefur verið þétt setið af veiðimönnum undanfarna daga enda hefur verið að ganga vel að setja í stóra urriða.

Það er nokkurn veginn sama hvar er drepið niður fæti en veiðin virðist þó vera langsamlega mest á ION svæðinu og við Kárastaði. Það eru líka að berast veiðifréttir af Villingavatnsárós, Svörtuklettum og svo við þjóðgarðinn en sem dæmi um veiðina þar voru þrír veiðimenn við Lambhaga sem fengu ellefu fiska þar í gærkvöldi. Lykilatriðið er að standa vaktina í það minnsta til miðnættis. Þeir fengu að sögn alla fiskana milli tíu og tólf um kvöldið og fyrir utan þá sem þeir náðu misstu þeir annað eins.

Sá stærsti var 86 sm og allir nema einn yfir 70 sm. Einn var þó greinilega stærstur en hann stökk og sýndi sig nokkrum sinnum á meðan það var verið að þreyta hann. Sú barátta fór þannig að samskeytin við flotlínu og undirlínu slitnuðu í átökunum.