Sebastian tekur við Fram

Sebastian Alexandersson, betur þekktur sem Basti, hefur verið ráðinn þjálfari karlaliðs Fram næstu þrjú árin.

Þetta var tilkynnt á miðlum Fram fyrr í dag en hann tekur við liðinu af Halldóri Jóhanni Sigfússyni sem söðlar um og tekur við Íslandsmeisturum Selfoss.

Basti þjálfaði einmitt lengi vel í akademíunni á Selfossi sem og meistaraflokk kvenna hjá félaginu áður en hann tók við Stjörnunni í Olís-deild kvenna þar sem hann hefur þjálfað síðustu tvö ár.

Stjarnan er nú í 3. sæti Olís-deildar kvenna en Fram er í 9. sæti Olís-deildar karla og er í harðri baráttu um að komast í úrslitakeppnina. Hlé hefur þó verið gert á mótinu næstu fjórar vikurnar vegna samkomubanns.