Viðskipti erlent

Wells Fargo fellst á að greiða milljarða vegna falskra reikninga

Kjartan Kjartansson skrifar
Mikið hefur gengið á hjá Wells Fargo vegna fjölda hneykslismála. Bankinn hefur farið í gegnum þrjá bankastjóra á þremur árum.
Mikið hefur gengið á hjá Wells Fargo vegna fjölda hneykslismála. Bankinn hefur farið í gegnum þrjá bankastjóra á þremur árum. Vísir/EPA

Bandaríski bankinn Wells Fargo hefur gert sátt við dómsmálaráðuneytið þar um að hann greiði þrjá milljarða dollara í sátt utan dómstóla vegna ásakana um að bankinn hafi brotið á viðskiptavinum sínum um árabil, meðal annars með því að stofna reikninga án vitundar og samþykkis þeirra.

Samkomulag Wells Fargo við dómsmálaráðuneytið og Verðbréfaeftirlit Bandaríkjanna (SEC) felur í sér að bankinn gengst við því að hafa innheimt milljónir dollara í þóknanir fyrir þjónustu sem starfsmenn bankans skráðu á viðskiptavini án vitundar þeirra.

Starfsmenn bankans eru sagðir hafa verið undir miklum þrýstingi um að selja þjónustu. Margir þeirra hafi reynt að ná óraunhæfum sölumarkmiðum með því að falsa skjöl og undirskriftir og jafnvel nota persónuupplýsingar viðskiptavina til þess að stofna nýja reikninga í nafni þeirra. Bankinn vissi af þeim vinnubrögðum allt frá árinu 2002 en greip ekki inn í fyrr en árið 2016, að því er segir í frétt Washington Post.

Sektin sem Wells Fargo þarf að greiða, jafnvirði um 384 milljarða íslenskra króna, nemur um það bil fimmtán prósentum af hagnaði bankans í fyrra. Hún er ein sú stærsta sem lögð hefur verið á fyrirtæki í tíð Donald Trump forseta.

Sáttin í dag er ekki sögð ná til brota einstakra starfsmanna. Enginn yfirmanna bankans hefur verið ákærður fyrir glæpi. Wells Fargo hefur verið sakaður um ýmis önnur brot, þar á meðal að hafa gengið ranglega að fasteignum hundruð viðskipta og að bílum þúsunda annarra.


Tengdar fréttir

Wells Fargo nær sátt vegna svikareikninga

Bankinn Wells Fargo samþykkir að greiða 110 milljónir dollara til að ná sátt eftir að starfsmenn hans stofnuðu reikninga í nafni viðskiptavina án þess að biðja þá leyfis.

Forstjóri Wells Fargo segir af sér

Bankinn hefur sætt harðri gagnrýni eftir að í ljós kom að starfsmenn hans stofnuðu milljónir reikninga í nafni viðskiptavina án vitundar þeirra og rukkuðu þá fyrir þjónustu sem þeir báðu ekki um.






Fleiri fréttir

Sjá meira


×