Viðskipti erlent

Banna misvísandi kosningaáróður á Youtube

Kjartan Kjartansson skrifar
Merki Youtube á spjaldtölvuskjá. Fyrirtækið er í eigu tæknirisans Google.
Merki Youtube á spjaldtölvuskjá. Fyrirtækið er í eigu tæknirisans Google. AP/Patrick Semansky

Myndbandadeilisíðan Youtube ætlar að fjarlægja misvísandi efni sem tengist forsetakosningunum í Bandaríkjunum sem fara fram síðar á árinu. Varaforseti fyrirtækisins segir að nýrri stefnu þess verði framfylgt óháð pólitískri afstöðu efnisframleiðendanna.

Samfélagsmiðlafyrirtæki hafa legið undir gagnrýni fyrir að bregðast lítt við straumi blekkinga og upplýsingafals sem hefur verið dreift í gegnum þau, ekki síst í aðdraganda kosninga víða um lönd. Upplýsingahernaður setti svip sinn á aðdraganda forsetakosninganna í Bandaríkjunum árið 2016 og er búist við því að það sama verði upp á teningnum fyrir kosningarnar í nóvember.

Youtube, sem er í eigu tæknirisans Google, hefur fram að þessu ekki verið með samræmda stefnu hvað varðar upplýsingafals. Reglur og skilmálar sem fyrirtækið kynnti í gær eiga að koma í veg fyrir að miðillinn verði misnotaður til að koma ósannindum á framfæri.

Myndbönd sem gefa notendum rangar upplýsingar um kjördag eða dreifa ósannindum um þátttöku í manntali sem bandarískar kjörskrár byggja á verða tekin niður samkvæmt nýju skilmálunum. Sömuleiðis verða myndbönd fjarlægð sem dreifa lygum um borgararétt frambjóðenda eða kjörgengi. Það virðist viðbragð við samsæriskenningum um að Barack Obama, fyrrverandi Bandaríkjaforseti, væri ekki raunverulega fæddur í Bandaríkjunum. Donald Trump, núverandi forseti, var lengi vel einn helsti málsvari þeirrar stoðlausu kenningar.

Þá ætlar Youtube að eyða aðgangi notenda sem villa á sér heimildir og látast vera annað fólk eða rásir, fela upprunaland sitt eða tengsl við ríkisstjórnir. Myndbönd þar sem virkni eins og ummæli og áhorf eru ýkt með bottum verða einnig fjarlægð.

New York Times bendir á að Youtube eigi ærið verk fyrir höndum enda hlaða notendur síðunnar upp um 500 klukkustundum af myndböndum á hverri mínútu. Youtube hefur einnig legið undir ámæli fyrir að ýta notendum að efni öfgasinna með því að sýna þeim meira af slíku efni í gegnum algrím sem knýr síðuna.

Fleiri samfélagsmiðlafyrirtæki hafa reynt að grípa til aðgerða til að draga úr upplýsingafalsi. Facebook tilkynnti í vetur að fyrirtækið myndi banna myndbönd sem hefur verið breytt með gervigreindarforritum en hefur verið gagnrýnt fyrir að leyfa ósannindi í pólitískum auglýsingum. Twitter gekk skrefinu lengra og bannaði pólitískar auglýsingar algerlega. Miðillinn ætlar þó ekki að skipta sér af tístum stjórnmálaleiðtoga, jafnvel þó að þau feli í sér lygar.


Tengdar fréttir

Twitter ætlar að banna stjórnmálaauglýsingar

Bannið við stjórnmálaauglýsingum er viðleitni Twitter til reyna að koma í veg fyrir upplýsingafals á samfélagsmiðlum í aðdraganda forsetakosninga í Bandaríkjunum á næsta ári.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Engar hækkanir skráðar í dag

Mesta lækkun dagsins


Engar lækkanir skráðar í dag
Velkomin á Vísi. Þessi vefur notar vafrakökur. Sjá nánar.