Verður fyrsti fram­kvæmda­stjóri Vörðu

Kristín Heba Gísladóttir hefur verið ráðin í starf framkvæmdastjóra Vörðu – rannsóknastofnunar vinnumarkaðarins. Verður hún fyrst til að gegna embættinu.

Í tilkynningu frá ASÍ segir að Kristín Heba sé með BA-gráðu í sálfræði frá Háskólanum á Akureyri og meistarapróf í auðlindafræði frá sama skóla.

„Undanfarin ár hefur hún starfað sem framkvæmdastjóri AkureyrarAkademíunnar en þar sá hún um daglegan rekstur, samskipti við stjórnvöld og kjörna fulltrúa, stjórnun verkefna auk þess að vera talsmaður AkureyrarAkademíunnar út á við. Þá hefur Kristín Heba starfað sem stundakennari við Háskólann á Akureyri frá árinu 2012,“ segir í tilkynningunni. 

Alþýðusamband Íslands og BRSB stofnaðu Vörðu - rannsóknarstofnun í vinnumarkaðarins í október 2019 til að efla rannsóknir á sviði vinnumarkaðar, félags- og efnahagsmála. Er stofnuninni ætlað að dýpka umræðuna um kaup og kjör og koma þannig með aukið fóður inn í baráttu launafólks fyrir bættri afkomu og betri lífsskilyrðum, líkt og segir í tilkynningunni.