Viðskipti innlent

Ekkert verður af stærsta hóteli Norðurlands

Stefán Ó. Jónsson skrifar
Fyrirhugað útlit hótelsins.
Fyrirhugað útlit hótelsins. MYND/AVH

Aðstæður á lánamarkaði og þróun ferðaþjónustunnar eftir fall WOW air kippa forsendunum undan byggingu nýs hótels KEA á Akureyri, sem fyrirhugað var að reisa við Hafnarstræti 80. KEA hafði áður áformað að reisa þar 150 herbergja hótel en Vikudagur greinir nú frá því að félagið hafi skilað lóðinni, hinni svokölluðu Umferðarmiðstöðvarlóð í miðbæ Akureyrar.

Greint var fyrst frá áformunum vorið 2017 en KEA hafði orðið sér úti um lóðina tveimur árum áður. Upphaflega var stefnt að opnun vorið 2019 en um hefði verið að ræða „stærsta hótelið sem verður starfrækt á Akureyri sem og reyndar á Norðurlandi öllu,“ eins og það var orðað í yfirlýsingu KEA á sínum tíma. 

 

Hönnunarvinna var þá vel á veg komin en hún var sögð krefjandi - „þar sem um er að ræða hús sem mun hafa sterka ásýnd í bæjarmynd Akureyrar um ókomna tíð.“ Ljóst er nú að einhver bið verður eftir þessari sterku ásýnd, því skortur á hagsælum skilyrðum kemur í veg fyrir að áform KEA gangi eftir eins og lagt var upp með að sögn Halldórs Jóhannssonar, framkvæmdastjóra KEA.

Hann segir í samtali við Vikudag að því hafi ekki verið annað í stöðunni en að skila lóðinni. Ekki hafi bætt úr skák að bæjaryfirvöld á Akureyri vildu ekki veita KEA lengri frest í haust, meðan beðið var eftir því að staðan myndi skána. Aukinheldur segir Halldór að hugmyndir KEA um að breyta skipulagi á lóðinni og ráðast í annars konar uppbyggingu á lóðinni hafi mætt litlum skilningi í röðum sveitarstjórnarfólks.

„Okkur þykir það leitt að ekki var skilningur á því að bíða með verkefnið vegna þessara erfiðu ytri skilyrða. En þetta er niðurstaðan og lítið við því að gera,“ segir Halldór. Það séu vonbrigði, enda hafi KEA varið fjármunum og tíma í undirbúning hins stóra hótels.


Tengdar fréttir

KEA reisir stærsta hótel Norðurlands

KEA fjárfestingarfélag hefur tekið ákvörðun um að hefja byggingu hótels við Hafnarstræti 80 á Akureyri eða á svokallaðri Umferðarmiðstöðvarlóð í miðbæ Akureyrar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Engar hækkanir skráðar í dag

Mesta lækkun dagsins


Engar lækkanir skráðar í dag
Velkomin á Vísi. Þessi vefur notar vafrakökur. Sjá nánar.