Zlatan segist vera eins og Benjamin Button nema að einu leyti

Zlatan Ibrahimovic, framherji AC Milan, segist vera eins og Benjamin Button, persónan sem eldist aftur á bak. 

Svíinn segir að einn stór munur sé þó á sér og persónunni sem kom fyrst fram í smásögu F. Scotts Fitzgerald sem var svo færð á hvíta tjaldið 2008. Brad Pitt fór þar með hlutverk Buttons.

„Ég er eins og Benjamin Button, nema ég hef alltaf verið ungur, aldrei gamall,“ sagði Zlatan við sjónvarpsstöð Milan.

Þrátt fyrir að vera á 39. aldursári er Zlatan enn í fullu fjöri og sýndi það svo sannarlega í leik Milan og Sampdoria í ítölsku úrvalsdeildinni á miðvikudaginn. Hann skoraði tvö mörk og lagði upp eitt í 1-4 sigri Milan.

Zlatan hefur skorað 50 deildarmörk í búningi Milan. Hann er eini leikmaðurinn sem hefur skorað 50 mörk eða fleiri fyrir bæði stóru liðin í Mílanó, Inter og AC Milan.

Zlatan kom aftur til Milan um áramótin. Hann lék áður með liðinu á árunum 2010-12 og varð ítalskur meistari með því 2011. Á þessu tímabili hefur Zlatan skorað níu mörk og gefið fimm stoðsendingar í sautján deildarleikjum.

Milan vill halda Zlatan og samkvæmt Gazzetta dello Sport hefur félagið boðið honum eins árs samning með möguleika á árs framlengingu.

Milan, sem er taplaust eftir að keppni hófst á ný í síðasta mánuði, tekur á móti Cagliari í lokaumferð ítölsku úrvalsdeildarinnar annað kvöld. Sama hvernig leikurinn fer er ljóst að Milan endar í 6. sæti.