Flugfreyjur undirbúa verkfall

Félagsmenn Flugfreyjufélags Íslands undirbúa nú verkfallsboðun eftir ákvörðun Icelandair. Flugfélagið sagði í dag upp öllum 38 flugfreyjum og þjónum sem störfuðu hjá félaginu, en um 900 flugfreyjum og flugþjónum var sagt upp í byrjun maí. 

Í samtali við fréttastofu segir Guðlaug Líney Jóhanndóttir, starfandi formaður FFÍ, að niðurstaðan sé vissulega vonbrigði. Hún sé alla jafna bjartsýn en í dag sé hún reið. FFÍ hafi borist tilkynning frá Icelandair í morgun þar sem þeim var tilkynnt að viðræðunum hafi verið slitið einhliða. Það hafi komið þeim að óvörum.

Hún segir stöðuna sem upp er komin vera óþekkt á íslenskum vinnumarkaði og eigi að vera ólíðandi í íslensku samfélagi. Flugfreyjur hafi farið að öllum reglum og sýnt samningsvilja. Viljinn sé enn til staðar, þrátt fyrir að Icelandair hafi komið „ömurlega“ fram við Flugfreyjufélagið.

Nú hefjist því undirbúningur verkfalls Flugfreyjufélagsins að sögn Guðlaugar, fyrsta skref sé að kalla saman félagsmenn sem séu ennþá á uppsagnarfresti hjá Icelandair. FFÍ sé aðili að ASÍ og alþjóðlegum samtökum sem Guðlaug segir að styðji flugfreyjur í þessum efnum. Verkfall á þessum tímapunkti „þjóni þeim tilgangi sem verkföll eiga að gera,“ segir Guðlaug. „Við getum líka kallað eftir stuðningi frá þeim samtökum sem við erum aðili að. Við munum gera það eftir því sem þurfa þykir.“

Endi á borði ríkisstjórnarinnar

Aðspurð hvort það hafi verið mistök að samþykkja ekki síðasta tilboð Icelandair minnir Guðlaug á að því hafi verið hafnað af rúmlega 70 prósent félagsmanna. Það hafi sent skýr skilaboð að hennar mati. Of langt hafi verið gengið í hagræðingarkröfum.

Hún segir hljóðið í sínum félagsmönnum alvarlegt. Fólki sé brugðið að félag eins og Icelandair, sem þiggur stuðning frá íslenska ríkinu, skuli haga sér með þessum hætti. Það sé með öllu ólíðandi og býst Guðlaug við því að þetta endi á borði ríkisstjórnarinnar.

Uppfært klukkan 16:05

Eftirfarandi tilkynning barst rétt í þessu frá Flugfreyjufélagi Íslands: 

Stjórn og trúnaðarráð Flugfreyjufélags Íslands (FFÍ) fordæmir óvænt og einhliða viðræðuslit Icelandair sem birt voru í fjölmiðlum í dag. Afstaða Icelandair setur FFÍ í þá afleitu stöðu að þurfa að hefja undirbúning að tafarlausum og víðtækum verkfallsaðgerðum. FFÍ er aðili að Alþýðusambandi Íslands og alþjóðlegum verkalýðssamtökum og hefur fullan stuðning við aðgerðir sínar þar. Samstöðuaflinu verður beitt af fullum þunga.

„Það eru gríðarleg vonbrigði að Icelandair kalli eftir því að flugmenn gangi í störf félagsmanna FFÍ og ég neita að trúa því fyrr en ég tek á því að vinnufélagar okkar muni koma þannig fram við samstarfsfélaga sína um árabil. Afstaða og viðhorf Icelandair í málinu eru til skammar og ég hef trú á að almenningur tekur slíkri lítilsvirðingu við launfólk ekki þegjandi og hljóðalaust,“ segir Guðlaug Líney Jóhannsdóttir, formaður Flugfreyjufélags Íslands.

Icelandair hefur á undanförnum mánuðum þegið háar fjárhæðir úr opinberum sjóðum og FFÍ væntir þess að málið verði tekið fyrir á vettvangi stjórnvalda hið fyrsta og geri þá kröfu til stjórnenda fyrirtækisins að þeir virði lög og leikreglur á íslenskum vinnumarkaði.