Viðskipti innlent

Play tilbúið að stökkva fyrr inn ef þörf krefur

Stefán Ó. Jónsson skrifar
Flugfélagið Play var formlega kynnt til leiks í byrjun nóvember í fyrra.
Flugfélagið Play var formlega kynnt til leiks í byrjun nóvember í fyrra. Vísir/Vilhelm

Forsvarsmenn flugfélagsins Play segjast vera tilbúnir að koma inn á flugmarkaðinn fyrr en stefnt hefur verið að, krefjist aðstæður þess. Allur undirbúningur félagsins síðustu mánuði hafi miðast við fyrst flug í haust og segja þau „stutt“ í að sala farmiða verði kynnt. Möguleikar félagsins hafi stóraukist á síðustu vikum enda muni það ekki taka „Covid-vandræðin“ með sér inn í framtíðina eins og mörg önnur flugfélög.

Ekki þarf að leita langt til að sjá dæmi þess. Rekstrarvandræði Icelandair hafa verið fyrirferðamikil í fréttum undanfarin misseri, ekki síst eftir eftirspurnarfall samhliða kórónuveirufaraldrinum. Arnar Már Magnússon, forstjóri Play, segist þó lítið vilja tjá sig um stöðu keppinautarins.

 Ljóst sé hins vegar að staða Icelandair sé alvarleg og að Play-liðar óski félaginu velfarnaðar. „PLAY er fyrst og fremst að koma inn á markað til að búa til samkeppni í flugi til og frá Íslandi og auka framboð fyrir ferðamenn á ódýrara flugi til Evrópu og vestur um haf,“ segir Arnar.

Arnar Már Magnússon, forstjóri Play.play

Ekki verður annað séð af yfirlýsingum Play-liða á síðustu vikum en að undirbúningur sé á lokametrunum. „Flugrekstrarleyfið er klárt, bókunarsíðan er tilbúin sem og samningar við þjónustuaðila, birgja sem og kjarasamningar. Það eina sem er í raun eftir núna er að átta sig á hvenær Covid endar og hvernig við klárum restina,“ sagði Skúli Skúlason, stjórnaformaður flugfélagsins, til að mynda fyrr í sumar.

Arnar Már segir að Play-liðar sjái fram á vaxandi eftirspurn eftir flugi í gegnum veturinn og inn á næsta sumar. Unnið sé að því að hefja áætlunarflug í haust vegna þeirra aðstæðna sem nú eru uppi. „Við erum hinsvegar tilbúin til að koma inn á markaðinn mun fyrr en það ef aðstæður krefjast þess,“ segir Arnar Már.

Airbus-vélarnar tilbúnar

Þannig séu flugvélamál félagsins „á mjög góðum stað,“ eins og Arnar orðar það. Aðgengi að vélum hafi breyst mikið að undanförnu. „Í dag er félag eins PLAY álitlegur kostur fyrir marga vegna þess að PLAY mun ekki fara með Covid vandræðin með sér inn í framtíðina og möguleikar okkar til þess að ná góðum árangri á markaði eru því búnar að stóraukast,“ segir Arnar.

Ekki skemmi fyrir að hópurinn að baki Play hafi reynslu af flugrekstri, en forsvarsmenn félagsins voru formlega kynntir til leiks á nýrri vefsíðu Play fyrir um hálfum mánuði. Reynsla Play-liða sé þannig „mjög heillandi fyrir t.a.m. flugleigusala,“ segir Arnar.

Félagið hafi þegar tryggt sér nokkrar nýlegar þotur úr Airbus A320-línunni sem séu tilbúnar að koma til landsins þegar kallið kemur. „Það er því nokkuð ljóst að aðgangur að vélum er ekki vandamál í stækkun PLAY næstu mánuðina og jafnvel árin.“

Sérhæfðir starfsmenn óskast

Um 40 manns starfa hjá Play í dag en félaginu bárust um 4000 starfsumsóknir þegar auglýst var eftir „leikfélögum“ í lok síðasta árs. Arnar segir að ekki hafi tekist að vinna úr þeim öllum en að þó hafi verið tekin nokkur hundruð starfsviðtöl. Þá sé „mjög líklegt“ að Play muni auglýsa eftir einstaklingum í „þónokkur sérhæfð störf á næstunni.“

Arnar segist þó ekki vera tilbúinn að gefa upp nákvæma dagsetningu, aðspurður hvenær sala flugmiða hefjist. Kórónuveiruaðstæður séu einfaldlega þannig að Play-liðar gætu þurft að breyta dagsetningunni með skömmu fyrirvara, þó svo að þau geri ekki ráð fyrir að þurfa þess. „Það er hinsvegar stutt í að við kynnum þá dagsetningu en við erum að vega og meta heppilegasta tímann,“ segir Arnar.

Verið sé að fínpússa hlutina. „. Við erum búin að nýta tímann vel í undirbúning flugrekstursins því að það er með þetta eins og allt annað að undirbúningur er lykilatriði og það er aldrei hægt að vera of vel undirbúinn,“ segir Arnar.


Tengdar fréttir

Play áætlar að hefja leik næsta haust

Skúli Skúlason, stjórnaformaður flugfélagsins Play, segir félagið stefna á að hefja sig til flugs í október á þessu ári. Hann segir flugmarkaðinn gjörbreyttan í kjölfar kórónuveirufaraldursins og segir stöðuna hagstæða fyrir nýtt flugfélag.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Engar hækkanir skráðar í dag

Mesta lækkun dagsins


Engar lækkanir skráðar í dag
Velkomin á Vísi. Þessi vefur notar vafrakökur. Sjá nánar.