Luft­hansa segir upp 22 þúsund manns

Þýska flugfélagið hefur greint frá því að til standi að segja upp 22 þúsund manns þar sem félagið reynir að bregðast við breyttu rekstrarumhverfi vegna heimsfaraldurs kórónuveirunnar.

BBC hefur eftir fulltrúum Lufthansa að reiknað sé með að markaðurinn verði lengi að taka við sér og að búið verði að fækka í flugvélaflota félagsins um hundrað vélar að faraldri yfirstöðnum.

Reiknað er með að um helmingur þeirra stöðugilda sem lögð verða af séu í Þýskalandi og standi vonir til að samkomulag náist við stéttarfélög um uppsagnirnar fyrir 22. júní.

Talsmenn flugfélagsins segjast vilja standa vörð um eins mörg störf og mögulega hægt sé, en alls starfa um 135 þúsund manns hjá félaginu á heimsvísu.