Lífið

Samanburður

Ragga Nagli skrifar
Ragnhildur Þórðardóttir, betur þekkt sem Ragga Nagli, skrifar pistla um heilsu á Vísi.
Ragnhildur Þórðardóttir, betur þekkt sem Ragga Nagli, skrifar pistla um heilsu á Vísi. Vísir/Vilhelm

Theodór Roosevelt var ekki bara bangsaforsetinn.Hann sagði að samanburður er þjófur gleðinnar.

Búdda sagði að samanburður er þjáning.

Samanburður er vanvirðing fyrir sjálfum þér því í staðinn fyrir að einblína á það sem við gerum vel þá er athygli okkar á öðrum.

Þú rænir þig gleðinni með að bera þig saman við aðra.

Við höfum nefnilega tilhneigingu til að bera okkur saman við þá sem eru mörgum klössum fyrir ofan okkur.

Súrdeigsbrauðið hjá mér er eins og tyggjóklessa miðað við Jóa Fel.Armbeygjurnar mínar eru vandræðalegar miðað við Katrínu Tönju.

Eldhússkáparnir haugdrullugir miðað við Sólrúnu Diego.Ekki jafn klár og Stjörnu-Sævar.

Hlaupin eru hjákátleg miðað við Arnar Péturs.

En við berum okkur líka saman við okkar nánustu og horfum einungis á það sem þau hafa en við ekki.

Vinkona sem klárar doktorsnámVinur að flytja í raðhús í úthverfi

Frændi að vinna í útlöndum.Frænka að æfa fyrir hálfmaraþon.

"Og hér er ég í leiguíbúð í Kópavogi, bara með masterspróf og saug puttann í fósturstellingu eftir 10 kílómetra hlaup í gær."

Þessi samanburður innrætir hjá okkur “ekki-nóguna” sem gargar allan daginn í hausnum fyrirvaralaust og ómeðvitað.

Við séum ekki nóg, gerum ekki nóg, eigum ekki nóg.Stöðugt samviskubit yfir að æfa ekki sjö daga vikunnar og sleikja ekki salatblað í hverri máltíð.

Niðurrifsseggirnir vopnaðir sleggjum og sprengibúnaði tæta niður sjálfsmyndina.

Sólin skín úti og fuglarnir syngja og trén blómstra.

En sólin skín skærar í Suður Afríku.Fuglarnir syngja hærra á Madagaskar.

Trén eru í meiri skrúða á Sardiníu.

Þarna dregur ský fyrir sólina, blómin ekki augngotu virði og fuglasöngurinn aumingjalegt væl.

Jákvætt hugarfar er mælikvarði á hvernig við tökumst á við erfiðleika.

Það sem þú veitir athygli það vex.Veitirðu athygli því sem þú gerir vel?

Eða veitirðu einungis athygli því sem þú gerir ekki nógu vel?

Samanburður rænir þig af því að horfa jákvæðum augum á tilveruna.Samanburður rænir þig þakklæti fyrir það sem þú átt.

Samanburður rænir þig núvitund því þú ert alltaf í fortíð og framtíð að berja þig niður.Þannig rænir samanburður þig líka tímanum þínum.

Þú hefur enga þolinmæði því allt á að gerast hratt og strax.Raunhæfar væntingar fara út í hafsauga.

Hugarfarið verður neikvætt.Ólga innra með þér.

Samanburður getur verið jákvæður og velgengni annarra getur vakið hjá okkur innblástur og veitt hvatningu til að reyna og gera betur.

Ef okkur gengur vel þá getur það keyrt sjálfstraustið upp í rjáfur.

En þegar samanburður vekur hjá okkur stöðugar tilfinningar um að vera ekki nóg, gera ekki nóg, eiga ekki nóg, þá er hann skaðlegur fyrir heilsuna.

Óraunhæfar væntingar til sjálfsins og ómannlegar kröfur fylgir ekkert nema neikvæð sjálfsmynd, lundin verður níðþung og sjálfstraustið fer niður í kjallara.

Þannig getum við aldrei uppfyllt þrár eða langanir, því við erum stöðugt óhamingjusöm með eigið líf.

Samanburður rænir þig sjálfstrausti, þakklæti, raunhæfum væntingum og hindrar þig í að ná velgengni.

Því við gefumst oft upp af því einhver annar er að gera hlutina betur en við. Hvers vegna að reyna?

Barn sem er að læra að labba dettur fimmtíu sinnum á bossann. Barnið hugsar aldrei með sér: “ohhh krakkinn í næsta húsi er miklu betri en ég. Hann er löngu byrjaður að labba. Nenni ekki að standa í þessu. Verð aldrei nógu góður.

Samanburður er mannlegt eðli sem hjálpar okkur að meta hvar við stöndum gagnvart öðrum og meta hvort okkur standi ógn af viðkomandi.

Óheilbrigður samanburður er hinsvegar ekki meðfæddur.

Slíkur samanburður er lærð hegðun og við getum því vanið okkur af þessari hegðun.

Við berum okkur saman á sviðum sem við höfum keyrt upp til skýjanna í mikilvægi fyrir hamingjusamt líf. Útlit, hjónaband, peningar, akademísk afrek.

Á hvaða sviði við upplifum okkur ekki nóg og að okkur skortir þá getur einfaldur póstur á instagramm meðan þú bíður á biðstofu tannlæknsins valdið sting í mallakút og neikvæðar tilfinningar sveima í sýsteminu allan daginn.

Kona sem er nýskilin sér myndband af hamingjusömu par að valhoppa á strönd.

Maður sem var að missa vinnuna sér vin sinn hlaða í status um stöðuhækkun.

Unglingurinn með komplexa yfir holdarfari sér vinkonu missa tíu kíló á ketó.

Notaðu samfélagsmiðla til sambanda en ekki samanburðar. Sendu skilaboð og heyrðu í vinum og takmarkaðu hversu mikið þú skoðar.

Gerðu vorhreingerningu á samfélagsmiðlum og feldu eða hentu út prófílum sem vekja hjá þér neikvæðar tilfinningar.

Berðu þig saman við einhvern sem er bara skörinni betri en þú. Ekki á toppi fæðukeðjunnar.

Þakkaðu fyrir allt sem þú hefur og gerir vel. Haltu þakklætisdagbók á hverjum degi.

Berðu þig saman við einu raunhæfu manneskjuna… sem ert þú sjálfur. Er ég að gera betur í dag en í gær?

Í staðinn fyrir að taka eftir hvað aðrir hafa sem þú hefur ekki, beindu athyglinni að hvað þú dáist að í fari annarrar manneskju. Hrósaðu viðkomandi. Hrós er leigumorðingi á öfund.

Mynd/Ragga Nagli

Tengdar fréttir

Nei án afsakana

Þegar þú segir JÁ við einhverju sem þú vilt ekki gera, hefur ekki umframorku fyrir eða tíma fyrir þá ertu samtímis að segja NEI við að eyða tíma, orku og athygli í sjálfan þig, eða fólkið í kringum þig.

Mismunandi týpur af föstu - Hvað hentar hverjum?

Eins og með allt þá er auðvelt að misnota föstur og gera of mikið af þeim en þá fara þær að hafa öfug og slæm áhrif eins og að misþyrma hormónabúskapnum, hárlos, þurr húð og heilaþoka.

Sjálfsrækt er ekki sjálfselska

Sjálfsrækt er grunnurinn í öllum samböndum, því hvernig þú kemur fram við sjálfan þig setur tóninn fyrir hvernig aðrir koma fram við þig.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.