Heilsuborg á leið í gjaldþrot

Heilsuborg er á leiðinni í gjaldþrot og má reikna með að nokkrir tugir fólks missi vinnuna. Viðskiptablaðið greinir frá og hefur eftir stjórnarformanni að ekki sé loku fyrir það skotið að annar rekstraraðili taki yfir reksturinn.

Heilsuborg hefur boðið upp á alhliða heilsurækt og sjúkraþjálfun í höfuðstöðvum sínum við Bíldshöfða.

Samkvæmt ársreikningi 2018 voru 30 stöðugildi hjá félaginu, sem tapaði þá 58,6 milljónum króna, en 47,8 milljónum árið áður.

Fram kom á Facebook-síðu Heilsuborgar á miðvikudag að vegna skipulagsbreytinga falla niður opnir tímar og þjónusta íþróttafræðinga í tækjasala dagana 12., 13. og 14. mars. Tækjasalurinn væri þó opinn.