Körfubolti

Elvar Már og félagar krýndir sænskir meistarar eftir að tímabilinu var aflýst

Óskar Ófeigur Jónsson skrifar
Elvar Már Friðriksson er sænskur meistari á sínu fyrsta tímabili með Borås.
Elvar Már Friðriksson er sænskur meistari á sínu fyrsta tímabili með Borås. Vísir/Daníel

Sænska körfuboltasambandið og sænska handboltasambandið eru ekki alveg samstíga í aðgerðum sínum vegna kórónuveirunnar.

Sænska körfuboltasambandið hefur aflýst tímabilinu og ákveðið að liðin sem eru efst í deildunum verði sænskir meistarar tímabilið 2019-20.

Sænska handboltasambandið lifir enn í voninni um að getað klárað tímabilið hjá sér með því að spila úrslitakeppnina eftir að deildarkeppninni lýkur. Það er samt til plan B og það er að deildarmeistararnir verði krýndir sænskir meistarar.

Ákvörðun sænska körfuboltasambandsins þýðir að Elvar Már Friðriksson er sænskur meistari á sínu fyrsta tímabili með Borås. Borås var með fjögurra stiga forystu á toppi sænsku deildarinnar þegar tímabilinu var aflýst.

Elvar Már hefur átt mjög flott tímabil með Borås og varð meðal annars efstur í stoðsendingum á tímabilinu með 7,7 slíkar í leik. Elvar skoraði sjálfur 16,9 stig að meðaltali í leik.

Sænska handboltasambandið ætlar að láta alla leiki fara fram en það verða engir áhorfendur leyfðir á leikjunum. Handboltasambandið mun þó seinka úrslitakeppninni sem hefst ekki fyrr en um miðjan apríl og mun líka fækka leikjum í henni.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.