„Leiðindavinna í erfiðu landslagi“

Uppfært 22:00

Búist er við því að slökkviliðsmenn verði að störfum fram á nótt í Borgarfirði þar sem gróuðreldur kviknaði í dag. Slökkviliðið í Borgarbyggð var kallað út auk slökkviliðsmanna frá Akranesi. Eldurinn er nærri Bifröst og aðstæður eru mjög erfiðar.

Björgunarsveitarmenn hafa einnig verið kallaðir út og slökkviliðsmenn frá Keflavík fyrir nóttina.

Heiðar Örn Jónsson, varaslökkviliðsstjóri í Borgarbyggð, segir stöðuna á þann veg að töluverður eldur logi enn í gróðrinum. Þó hafi náðst að hefta töluvert útbreiðslu hans.

„Þetta er leiðindavinna í erfiðu landslagi en við erum með gríðarlega öflugan mannskap sem sinnir sínu verki mjög vel,“ segir Heiðar.

Um 40 slökkviliðsmenn frá Borgarbyggð. Tuttugu frá Akranesi og um tíu á leið á vettvang frá Keflavík. þar að auki eru um tuttugu björgunarsveitarmenn að störfum.