Þungir dómar vegna hryðjuverkasamtaka sem eru sögð tilbúningur

Mannréttindasamtök fullyrða að meint hryðjuverkasamtök sem sjö rússneskir róttæklingar voru dæmdir í fangelsi fyrir að tilheyra í dag séu í raun ekki til og séu uppspuni rússnesku leyniþjónustunnar til að bæla niður andóf gegn stjórnvöld. Sá þeirra sem hlaut þyngsta dóminn var dæmdur í átján ára vist í fangabúðum.

Dómstóll í borginni Penza dæmdi mennina í sex til átján ára fangabúðavist fyrir að tilheyra hryðjuverkasamtökum sem eiga að kallast Netið (r. Set). Rússnesk yfirvöld saka mennina um að hafa lagt á ráðin um að steypa ríkisstjórn landsins af stóli, að sögn breska ríkisútvarpsins BBC.

Lögmenn mannanna og mannréttindasamtök fullyrða á móti að mennirnir hafi verið pyntaðir og þvingaðir til að skrifa undir játningar. Ákærurnar á hendur þeim séu tilbúningur og samtökin sem þeir eiga að tilheyra sömuleiðis.

Alexei Navalní, leiðtogi rússnesku stjórnarandstöðunnar, segir refsidóma mannanna „hrollvekjandi“ og að hryðjuverkasamtökin Netið séu „uppskálduð hryðjuverkasamtök“. Mannréttindasamtökin Amnesty International kölluðu ákærurnar „hugarburð rússnesku öryggisþjónustunnar“ sem væri notaður til að múlbinda aðgerðasinna áður en dómarnir voru kveðnir upp.

Talsmaður Vladímírs Pútín forseta segir að forsetinn viti af máli mannanna og hafi skipað yfirvöldum að ganga úr skugga um að allt hafi farið fram eftir lögum. Hann ætli sér aftur á móti ekki að grípa inn í.

Mennirnir staðhæfa allir að samtökin sem þeir eigi að tilheyra séu tilbúningur leyniþjónustustofnunarinnar FSB sem hafi falsað sönnunargögn. Þeir segjast vera kunningjar með sama tónlistarsmekk auk þess sem þeir deili andúð á nasisma og aðhyllist vinstristefnu.

FSB hefur hafnað ásökunum mannanna um að þeir hafi verið beittir ofbeldi til að knýja fram játningar. Dmitrí Ptsjelintsev, sem hlaut þyngsta dóminn fyrir að hafa stofnað samtökin, segir að hann beri ör eftir að honum voru gefin raflost. Honum hafi verið neitað um að fá lækna til að meta áverkana.

Alls hafa tíu manns verið handteknir í Penza og Pétursborg verið handteknir fyrir að tilheyra Netinu. Fyrstu handtökurnar áttu sér stað í október árið 2017. Meintir félagar í samtökunum voru þá sakaðir um að leggja á ráðin um árási í kringum heimsmeistaramótið í knattspyrnu sem var haldið í Rússlandi árið eftir og fyrir forsetakosningar þess árs.